Igipolisi cya Uganda mu rwego rw’iperereza ku ibura rya Sgt (Rtd) Rene Rutagungira kuri uyu wa Gatanu ushize cyafashe umugore we, Jacinta Dusangeyezu kimutwara kuri station ya polisi ya Old Kampala kimuhata ibibazo nk’uko tubikesha Chimpreports.
Iyi nkuru ikaba ivuga ko igipolisi cya Uganda kirimo gushaka Rutagungira washimutiwe mu kabari kitwa Bahamas Bar mu ijoro ryo kuwa 08 Kanama , aho bivugwa ko yashimuswe n’abakozi b’inzego z’ubutasi za Uganda.
Ubwo iki kinyamakuru cyabazaga Dusangeyezu yemeje aya makuru agira ati: “ Nibyo, ni ukuri narahamagawe kuri polisi na none ngo nkore indi statement .”
Yakomeje agira ati: “ Polisi yashakaga kumenya byinshi ku bantu bari bari kumwe na Rene rirya joro. Nababwiye ko abagabo batatu bari kumwe nawe ari inshuti ze za kera . (Karekezi, Padiri na Idrissa).”
[xyz-ihs snippet=”google-pub”]
Dusangeyezu yakomeje abwira Chimpreports ko kuri station ya polisi yabahaye andi makuru yari yakusanyije ayakuye ku bantu batandukanye bamuhamagaye bamubwira ko umugabo ugaragara muri video yagaragaje uko Rene yashimuswe, ari Capt. Agaba wo mu rwego rw’ubutasi bwa gisirikare (CMI) rwa Uganda.
Uyu Capt. Agaba ngo akaba ari we wari uyoboye igikorwa cyo gushimuta Rene Rutagungira akurwa mu kabari yari arimo yinjizwa mu modoka yari iparitse hanze.
Abo mu muryango wa Rene bavuga ko babwiwe ko yabanje gufungirwa ahantu muri Mbuya, mu mujyi wa kampala, aho yahatiwe ibibazo n’abashinzwe iperereza mu gisirikare.
http://www.bwiza.com/uganda-amashusho-agaragaza-uko-sgt-rtd-rutagungira-yashimuswe-yagiye-ahagaragara/
Bivugwa ko kandi Sgt (Rtd) Rene Rutagungira akekwaho n’inzego z’umutekano za Uganda kugira uruhare mu guhiga bamwe mu basirikare b’u Rwanda bahunga igihugu bagahungira muri Uganda, ndetse no kugira uruhare mu bikorwa byo kurasira aba basirikare muri Kampala.
Ku rundi ruhande amakuru amwe avuga ko uyu Rene nawe yavuye mu Rwanda ahunze yanga kugirirwa nabi n’inzego z’umutekano, mu gihe Ambasaderi w’u Rwanda I Kampala, Frank Mugambage avuga ko Atari azi ko Rene hari ibyaha akurikiranweho mu Rwanda.
Ambasaderi Mugambage avuga ko Rene yari umunya-business wambukiranya umupaka w’u Rwanda na Uganda kenshi nta kibazo agize.
Umuvugizi w’igisirikare cya Uganda, Brig. Richard karemire ngo ntacyo aravuga kuri aya makuru mashya, gusa umuvugizi wungirije, Lt. Col Deo Akiiki mu cyumweru gishize yavuze ko atazi aho Rene aherereye. Ati: “ Nabibonye ku mbuga nkoranyambaga ”.
Abajijwe niba UPDF yaragize uruhare mu ishimutwa rya Rene, Akiiki yasubije agira ati: “ Ntabwo dushimuta abantu. Nta makuru mfite y’uko twabigizemo uruhare. Kugeza ubu nanjye nta makuru mfite nkawe. ”
Sgt (Rtd) Rene Rutagungira yakoreye igisirikare cy’u Rwanda igihe kinini mbere yo gusezera akajya kwikorera. Abayobozi muri ambasade bavuga ko yageze muri Uganda mu 2014, akaba afitanye abana babiri na Jacinta Dusangeyezu.
Dusangeyezu akaba avuga ko igipolisi cyamusezeranyije ko kigiye kuvugana na CMI kuri iki kibazo.
Kanda hano ujye ubona amakuru yihuse kandi kugihe kuri Facebook no kuri twitter
Philippe Nsengiyumva – bwiza.com
