Guverinoma ya Uganda irashyira ingufu mu buhinzi bw’imigano. Ibona ko iki gihingwa gikomeye, gikura vuba, gifite ubushobozi bwo guhindura ubuzima bw’abagihinga mu gihe abayobozi b’ibanze bashimangira akamaro mu gufashwa mu kongera ibicanwa mu baturage bo mu cyaro, gufasha kugabanya igitutu cy’igabanuka ry’amashyamba, ahanini agizwe n’inturusu.
Abashinzwe kubungabunga ibidukikije bashima imigano nk’igihingwa gikomeye gishobora guhingwa hafi ya hose mu gihugu, mu gihe abakibyaza umusaruro bakibona nk’igihingwa cyinjiza amafaranga menshi kandi akoreshwa mu buryo butandukanye, uhereye ku bikoresho byo mu nzu kugeza ku duti dusukura amenyo.
Taga Nuwagaba, umuhinzi n’umucuruzi, afite uruganda rukora ibikoresho by’imigano hafi y’umurwa mukuru wa Uganda, Kampala. Ati« Ni ibintu bitandukanye bidasanzwe  », ati. « Dukora ibicuruzwa bike, ariko dushobora gukora byinshi. Ameza, intebe, amakaramu, ibikombe, amashusho…  »
Nubwo amoko amwe y’imigano ahingwa muri Uganda atumizwa muri Aziya,ariko hari andi gakondo yimeza mu burasirazuba bwa Uganda yibera mu gasozi.
Mu birometero bike uvuye i Mbarara mu burengerazuba bwa Uganda, umurima munini w’ubucuruzi urimo hegitari zirindwi z’imigano. Iyi migano yo mu murima wa Kitara ibungabunzwe neza, kandi mu bubiko imigano 10,000 itegereje kugurishwa.Umuzamu waho, Joseph Katumba, avuga ko aho acunga habaye nk’aho bigishiriza abashaka kumenya akamaro k’umugano. Katumba avuga ko imigano ubundi isarurwa nyuma y’imyaka itatu n’itanu ihinzwe, ubundi yafatwa neza umurima wayo ukaba ushibora kumara inyaka 50.
Umugano nta gihe runaka cyo guterwa ugira kandi urongera ugakura iyo umaze gucibwa utitaye ko ubutaka ari bwiza cyangwa bubi bitandukanye n’inturusu zigira ibyo zisaba byihariye.
Gusa ngo abenshi ntibarumva inpamvu basimbuza inturusu zabo imigano, cyane ko umugano umwe ugurishwa idolari rimwe (arenga 1300RWF) bitandukanye n’uko inturusu igurishwa. Bisaba rero ko abahinzi baba bafite umurima munini.
Ababashishikariza ariko banavuga ko abantu bagiye muri ubu buhinzi bagomba kureba umugano nk’ibindi bihingwa ngengabukungu nk’ikawa n’icyayi igihe babihinga, umusaruro uratinda ariko ni mwiza.
Nubwo abantu benshi bashishikajwe no guhinga imigano, imirima ihingwamo imigano si myinshi ngo ibe yahaza isoko .Guverinoma ya Uganda yashyizeho politiki y’imyaka icumi yo gutera hegitari 300.000 z’imigano mu 2029, cyane cyane ku butaka bwite, mu rwego rwo kurushaho gutera amashyamba.
Iyi ni intego ikomeye. Ishyirahamwe ry’abahinzi b’imigano rya Uganda, rifite abanyamuryango 340, ryateye hegitari 500 gusa.
Nubwo abantu benshi bashishikajwe no guhinga imigano, abayobozi bakeneye gushishikariza abahinzi benshi bo mu cyaro cya Uganda gutera amasambu manini imigano nk’ubwoko bushya bw’igihingwa kibaha amafaranga.
Kuva aho umugano utangiye guhererwa agaciro ukorwamo intebe, amashusho y’imitako…, bamwe mu bagande batangiye no gukora amagare akoze mu migano.
Bwiza.com
