Umukandida ku mwanya w’umukuru w’igihugu yari asanzweho, Paul kagame yakomereje ibikorwa byo kwiyamamaza mu karere ka Rwamagana.
Ibikorwa byo kwiyamamaza kuri iki cyumweru tariki ya 23 Nyakanga 2017, umukandida Paul Kagame yabikomereje mu murenge wa Kigabiro, akarere ka Rwamagana, nyuma yo kubisoza muri Kirehe na Ngoma, uturere twose two mu Ntara y’Iburasirazuba.
Abaturage babarirwa mu bihumbi bakaba bateraniye mu kibuga cyo muri uwo murenge wa Kigabiro, baje kwakira umukandida wabo, Paul Kagame ukomeje ibi bikorwa byo kwiyamamaza kuri munsi wa 10 wa byo.
Â
 Abari n’abategarugori barashima Kagame Paul wahaye umugore ijambo
Â
Uko umuhango wagenze:
16:11: Nibwo Umukandida Paul Kagame yageze i Kigabiro
Umukandida Paul Kagame, ageze aho imbaga y’abaturage yari iteraniye, yabanje kuzenguruka abasuhuza, bamwakiranye urugwiro, amashyi n’impundu, bamugaragariza urukundo n’ikizere bamufitiye.
[xyz-ihs snippet=”google-pub”]
16:14: Indirimbo y’umuryango
Mu gihe umukandida,
Paul Kagame yari amaze gusuhuza imbaga y’abaturage, ageze mu byicaro bye, hamwe n’abandi baturage bahagaze, baririmbye indirimbo y’umuryango. Bagira bati “FPR muryango w’Abanyarwanda, waharaniye kera kuzarurengera, amaboko yacu azakorera u Rwanda,…
16:18: Ijambo rya Perezida w’ishyaka PDC
Mukabaranga Agnes, yatangiye ashimira umukandida Paul Kagame ku bw’icyubahiro avuga ko yahaye akarere ka Rwamagana.
Ijambo yavuze yatangaje ko arivuga nka kavukire yo muri Rwamagana nyuma anavuge mu izina ry’ishyaka ahagarariye. Ati “ Turibuka ko tugukesha kubaho, ubwo urugamba rwari rukomeye rugeze muri Kayonza, mwokeje igitutu abicanyi,… twagirango tubashimire nyakubahwa Perezida agaciro mwadusubije.
Turabashimira ibyiza byaturutse ku mpinduka mwazanye nyuma yo kwinjira mu gihugu mukakiyobora. Mpereye ku buyobozi nyakubahwa, ikibazo gisigaye ndabona ari uguhitamo, ubu amashuli yaratwegereye muri Rwamagana,… ibyo twavuga ni byinshi dukesha icyerekezo 2020.
Arashima iterambere akarere ka Rwamagana kamaze kugeraho kubera FPR Inkotanyi na Paul Kagame, by’umwihariko ubu ibiro by’Intara y’Iburasirazuba bikaba byarubatswe muri Rwamagana. Arashima FPR Inkotanyi na Paul Kagame ku kwimakaza Demokarasi.
Akomeza agira ati“Kuva muri 90 na 91, mu gihe FPR yatangiraga imishyikirana PDC mwari kumwe, mugerageza inzira y’amahoro. Iyo tugiye mu bihe byo gutora, ibyo byose turabizirikana, FPR ifite imbaraga ariko yemeye gufatanya n’indi mitwe ya politiki kugirango buzuzanye mu kubaka iki gihugu.
Nyakubahwa Paul Kagame muri bariya bose biyamamaza ni we ukwiriye ikizere, n’abaturage bati “Ni wowe”.
Arakomeza ati “Nyakubahwa Paul Kagame areba kure, icyo avuze aragikora, Banyarwamagana ku itariki 4, inkoko izabe ari yo ngoma, tumutore perezida Paul Kagame kuko ni umurezi usobanutse,… ni perezida w’Abanyarwanda bose, ntihazagire ugushuka, nta wundi, nta wundi, nta wundi”.
16:31: Ubuhamya bwa Speraton Ntawumenyumunsi
Speraton, atuye muri aka karere ka Rwamagana, ubu ni umugabo witeje imbere mu gihe mbere atagiraga n’akarima ko guhingamo. Avuga ko mu mwaka wa 2000, nibwo Abanyamuryango ba FPR Inkotanyi batangiye kumugira inama zirimo n’izo kwizigamira, no gukora cyane.
Ati “Kuva icyo gihe nakurikije inama zabo, kugeza ubu mfite ubutaka bwa hegitari 10, niteje imbere rwose, mfite inzu, mfite radio na Televiziyo (Flat)”.
Ni umuhinzi w’urutoki, yahinduye intekerezo amenya no kwegera banki agurizwa miliyoni 9, ubu arazigereje azishyura, afite abakozi 10 bahoraho, akagira n’abandi 40 akoresha.
Afite indoto zo kugura imodoka, izamufasha kugeza umusaruro we ku isoko, ibyo byose amaze kugeraho ngo ni Paul Kagame.
Yasoje agira ati “Banyamuryango rero, ibirori byacu tubiriro, ku itariki ya 4 Kanama, igikumwe cyacu tuzagitere ku igipfunsi”.
16:39: Ijambo rya Perezida w’ishyaka PPC, Dr Mukabaranga,
Perezida w’ishyaka PPC, avuga ko kuzatora umukandida Paul Kagame ari 100%, agashima ubufatanye FPR yagiranye n’andi mashyaka ya politiki.
Ishyaka PPC ngo ryavutse muri 2003, nyuma y’ukwezi kumwe ryatanze umukandida ku mwanya w’umukuru w’igihugu ari we we, bwari ubwa mbere umugore agaragara mu bikorwa nkibyo kuva u Rwanda rwabaho.
Ati “ nta mugore wigeze ayobora ishyaka mbere y’uko muyobora u Rwanda, nta mugore wigeze yiyamamariza kuyobora u Rwanda mbere y’ubuyobozi bwanyu, mu bindi bihugu iyo Perezida amaze kutorwa agendana n’abakire, ariko nyakubahwa wacu ajyana n’abakene kugirango twese tujyane tugere kure”.
Akomeza avuga ko kubera gahunda zazanywe na Paul Kagame, ko umubare w’abakene wagabanyutse, aravuga VUP, Ubudehe, Girinka, uburenzi kuri bose,…
Ati “Nyakubahwa Perezida tugushimira ko udasigaza inyuma”.
Yasoje agira ati “None kugirango tuzakomeze gutera imbere mu majyambere, icyo ndimo kubasaba ni ugutora neza ntihazagire urupapura ruzaba imfabusa, ntabwo dushaka imfabusa ahubwo turashaka 100%.
16:54: Ijambo ry’ushinzwe kwamamaza umukandida
Ushinzwe ibikorwa byo kwamamaza umukandida wa FPR Inkotanyi mu gihugu, Uwamariya Odette, arashima urugwiro Abanyarwamagana bakiranye umukandida, ko ari ikimenyetso cy’urukundo bamukunda.
Arashima iterambere muri Rwamagana kugera naho ubu indabo zihingwa muri aka karere zisigaye zigemurwa mu mahanga, ibyo ngo ni imiyoborere myiza ya FPR Inkotanyi na Perezida Paul Kagame.
Â
17:00: Ijambo ry’umukandida, Paul Kagame
Yatangiye ashimira abaturage ba Rwamagana, avuga ko atuye ku mupaka wa Rwamagana na Kayonza, ndetse ko muri utu turere hose ahatuye.
Arakomeza agira ati “Banyarwamagana rero igihugu cyacu n’amateka yacu, by’umwihariko n’ibikorwa bizubaka igihugu cyacu bigomba kuba bifite ubudasa nta handi wabikura.
Ubudasa bumwe bushingira ku bufatanye, ku bumwe, ku bushake Abanyarwanda bafite kugirango twubake igihugu cyacu tugiteze imbere, ku buryo n’abakiziho amateka mabi bajye baza badusange aho turi.
Aho turi naho dushaka kujya niho habereye Abanyarwanda, banyarwamagana rero mufite uruhare runini mu kuzana impinduka.
Itariki 4 z’ukwezi kwa 8 ni ibiduha amahirwe yo kongera ubumwe, Demokarasi n’amajyambere, ibyo rero birasaba imbaraga za buri wese, iz’urubyiruko, abagore, abagabo, abasaza bacu bakuze, nubwo bakuze batanga umusanzu wabo.
