Umuyobozi mukuru w’urwego rw’ubutasi rw’igisirikare cy’u Bufaransa, Général Jacques Langlade de Montgros biravugwa ko ateganya kugirira uruzinduko mu Rwanda mu mpera y’uku kwezi k’Ugushyingo.
Ikinyamakuru Africa Intelligence tariki ya 25 Ugushyingo cyasobanuye ko Gen. Langlade azagirana ikiganiro na mugenzi uyobora ubutasi bw’u Rwanda, Gen. Maj. Vincent Nyakarundi n’Umugaba Mukuru w’ingabo z’igihugu, Gen. Jean Bosco Kazura.
Ikigamijwe cyane muri uru ruzinduko ni ugukomeza ubufatanye bw’igisirikare cy’u Bufaransa ndetse n’icy’u Rwanda no kumurika umusirikare uzahagararira iki gihugu mu biro bya Ambasade, Colonel Nicolas Dufour.
Bivugwa ko ikibazo cy’umutekano muke mu burasirazuba bwa Repubulika ya Demukarasi ya Congo (RDC) na cyo kizaba kiri ku murongo w’ibiganirwaho, cyane ko u Rwanda rushinjwa gufasha M23 iri kurwanirayo.
