Ibitangazamakuru byo mu Burusiya bivuga ko umugabo wo muri Koreya y’Epfo yafungiwe mu Burusiya ashinjwa ubutasi.
Minisiteri y’ububanyi n’amahanga ya Koreya y’Epfo nayo yemeje itabwa muri yombi, ivuga ko bagerageza gutanga ubufasha bushoboka.
Ikigo cy’itangazamakuru cya Leta Tass ,cyatangaje ko Baek Won- yafatiwe mu mujyi wa Vladivostok uri mu burasirazuba bw’iki gihugu mu ntangiriro z’uyu mwaka ubu akaba ari muri gereza y’i Moscou.
Bivugwa ko ari we munya Koreya wa mbere wafunzwe mu Burusiya akekwaho ubutasi.
Minisiteri y’ububanyi n’amahanga ya Korea y’Epfo , itangaza ko ikomeje iperereza ngo hamenyekane uko uyu mugabo yafashwe.
Yonhap, ikinyamakuru cyo muri Koreya y’Epfo, kiratangaza ko Bwana Baek yatawe muri yombi n’Urwego rushinzwe umutekano mu Burusiya muri Mutarama nyuma yo kugera i Vladivostok avuye mu Bushinwa.
Iki kinyamakuru cyavuze ko yari aherekejwe n’umugore we, na we wafunzwe ariko nyuma akaza kurekurwa. Iki kinyamakuru Kandi cyatangaje ko nyuma yo kurekurwa ashobora kuba yagarutse muri Koreya y’Epfo.
Bwana Baek niwe munyamahanga uheruka gufatwa n’Uburusiya ashinjwa gutata kuva intambara yo muri Ukraine yatangira mu myaka ibiri ishize.
Ni mu gihe Moscou yagiye ushinjwa gufata abenegihugu b’ibindi bihugu kugira ngo ibakoreshe mu rwego rwa politiki.
Muri abo banyamahanga bagiye bafatwa harimo n’umunyamakuru w’umunyamerika wakoreraga Wall Street Journal, Evan Gershkovich ,wafunzwe muri Werurwe umwaka ushize ashinjwa ubutasi .
