Urukiko rukuru rwa Dar es Salaam muri Tanzania rwategetse umuyobozi w’igitangazamakuru Tanzanite, Cyprian Musiba kwishyura Bernard Kamillius Membe wabaye Minisitiri w’Ububanyi n’Amahanga indishyi ya miliyari 6 z’amashilingi (Frw miliyari 2.6).
Urukiko rwafashe iki cyemezo nyuma yo guhamya Musiba icyaha cyo kwanduriza izina Membe mu 2018.
Muri uwo mwaka ni bwo Membe yitabaje ubutabera arega Musiba kumutangazaho amakuru y’ikinyoma yatumye atakarizwa icyizere muri rubanda.
Aya makuru Membe yahakanye yivuye inyuma, yavugaga ko yaba ari mu mugambi w’ibanga wo kuzambya gahunda y’uwari Perezida wa Tanzania, nyakwigendera Dr John Pombe Magufuli yo kwiyamamariza manda ya kabiri.
Musiba yategetswe kwishyura amagarama yose y’urubanza.
