Umukinnyi w’imikino yo gusiganwa ku magare wo muri Kenya, Sule Kangangi, kuri uyu wa Gatandatu ushize yishwe n’impanuka ikomeye ubwo yarushanwaga mu isiganwa rya Vermont muri Leta Zunze Ubumwe za Amerika.
Kangangi yari atwaye ku muvuduko mwinshi mu isiganwa rya Vermont Overland ubwo yakoraga impanuka.
“Sule ni capitaine wacu, inshuti, umuvandimwe. Ni na papa, umugabo n’umuhungu w’umuntu. Icyuho kirasigara iyo igihangange kiguye. Sule yari igihangange, ”Ikipe ye AMANI yanditse ibi ku mbuga nkoranyambaga. Ati: “Aho kutuyobora imbere y’itsinda, ubu azatuyobora nk’inyenyeri ituyobora mu gihe tugenda dutera imbere mu gusohoza inzozi ze.”
Nk’uko tubikesha Ibiro Ntaramakuru by’Abanyamerika, Rachel Ruto, umugore wa perezida watowe muri Kenya, William Ruto, yanditse ku rubuga rwa Twitter ko yatunguwe no kumenya amakuru ababaje ko Sule yitabye Imana nyuma y’impanuka ikomeye.
Yanditse ati: “Mbabajwe cyane n’umuryango we, ndetse n’umuryango wose w’amagare, wabuze umuhanga mu gusiganwa ku magare, umujyanama ndetse n’incuti.” Ati: “Twese tuzamukumbura nk’umuntu. Kenya yatakaje ‘champion’. Uruhukire mu mahoro Sule. ”
Vermont Overland ni isiganwa rya miles 59 (kilometero 95) ku muhanda urimo metero zigera ku 7.000 zo guterera nk’uko urubuga rw’irushanwa ruvuga. Abayobozi bavuga ko ku wa Gatandatu abanyonzi bagera kuri 900 barushanwaga mu irushanwa ritangirira rikarangirira mu gace ka Brownsville mu mujyi wa West Windsor muri New Jersey.
Ku cyumweru, Ansel Dickey, nyiri Vermont Overland, yagize ati: “Vermont Overland yababajwe cyane n’urupfu rubabaje rwa Suleiman ‘Sule’ Kangangi mu gihe cya The Overland.”
Ati: “Yari inshuti nziza n’umukinnyi utera imbaraga kandi w’intwari kuri bagenzi be ndetse n’umuryango w’amagare ya muri rusange. Twese twifatanije n’umuryango we, inshuti ze, Team Amani, ndetse n’abaturage ba Kenya bababajwe n’urupfu rwe uyu munsi. ”
