Umuraperi Flo Rida yahawe miliyoni 82,6 z’amadolari nyuma yo gutsinda mu rubanza yarezemo sosiyete ikora ibinyobwa bitanga ingufu yitwa Celsius .
Flo Rida, amazina ye nyakuri ni Tramar Dillard, hamwe na sosiyete ye yitwa Strong Arm Productions, bareze Celsius Holdings Inc. muri Gicurasi 2021, bavuga ko iyi sosiyete yarenze ku masezerano bagiranye hagati ya 2014 na 2018.
Ku wa Gatatu, inteko y’abacamanza bo muri Florida y’Amajyepfo yasanze Celsius ihamwa n’icyaha cyo kutubahiriza ayo masezerano. Inteko y’abacamanza yasanze kandi Celsius mu buriganya yarahishe amakuru Dillard.
Nk’uko ikinyamakuru NBC News kibitangaza, Dillard mu ijambo rye yavuze ko yongeye “kwizera imikorere y’ubucamanza” kubera iki cyemezo.
Ati: “Uru rwari urugendo rurerure, ariko ntitwacitse intege. Kuva mu ntangiriro, nashakaga gusa ibyo nakoreye, nta kindi …”
Mu itangazo rye, uwunganira Flo Rida, John Uustal, yagize ati: “Twavuze ko twizeye ko inteko y’abacamanza izakora igikwiye, tuzizera umwanzuro, tukemera icyemezo cy’abacamanza. Nishimiye ko muri uru rubanza, inteko y’abacamanza yanzuye ko Flo Rida agomba kubona ibyo yakoreye. ”
Nk’uko ikirego cyavugaga, Dillard yagize uruhare runini mu “gutangiza ibihe bishya by’iterambere ry’isosiyete, mu gukura kwayo, ndetse no kwaguka” kandi afasha kumenyekanisha Celsius kuri “miliyoni nyinshi ku Isi.”
Itsinda ryunganira Dillard ryatangaje ko atahawe ingurane mu bihembo yasezeranyijwe ndetse n’imigabane y’imirimo ye.
Ikipe ya Dillard yavuze kandi ko Celsius yahishe Dillard ko intego nyamukuru yo kugurisha mu masezerano ye yujujwe.
Muri 2014, Celsius yagurishaga umugabane ku $ 1 ariko ubu igurisha hejuru ya $ 100. Uustal yavuze ko Dillard yashakaga guhabwa 1% yasezeranijwe.
