Umurundikazi ukina umukino wo kwiruka, Francine Niyonsaba, amaze kwandikira amateka akomeye mu irushanwa rya Diamond League i Zurich mu Busuwisi, yegukana umwanya wa mbere mu kwiruka ku ntera ya metero 5000.
Kuri iyi ntera, Francine w’imyaka 28 y’amavuko yirutse iminota 14, amasegonda 28 n’ibice 98 asize abarimo Umunyakenyakazi wa mbere ku Isi mu kwiruka ku ntera ya metero 5000, Hellen Obiri wabaye uwa kabiri akoresheje iminota 14, amasegonda 29 n’ibice 68.
Umwanya wa gatatu wegukanwe na Taye Ejgayehu wo muri Ethiopia wakoresheje iminota 14, amasegonda 30 n’ibice 30, imyanya ibiri ikurikiyeho yegukanwa n’Abanyakenyakazi; Kipkemboi Margaret Chelimo na Cherono Eva.
Niyonsaba ukunze kwitwa Fara, aherutse kwegukana umudali wa zahabu mu irushanwa ryo kwiruka ku ntera ya metero 3000 ryabereye i Paris mu Bufaransa n’iryo kwiruka kuri metero 5000 ryabereye i Brussels mu Bubiligi mu cyumweru gishize.
Francine Niyonsaba akomeje kwitwara neza ku rwego mpuzamahanga nyuma yo gukurwa mu cyiciro cy’abiruka mu ntera ngufi mu mikino ya Olempike 2020 yabereye i Tokyo mu Buyapani kuva tariki ya 23 Nyakanga 2021 kugeza tariki ya 8 Kanama 2021.
