Habyarimana Jean-Claude alias Jules Mulumba uri mu barwanyi bakuru b’umutwe witwaje intwaro wa Nyatura CMC ugizwe n’Abahutu b’Abanyekongo bahanganye na M23, yagaragaje ko yashenguwe bikomeye no kuba Général Major Peter Cirimwami wabafashaga yarimuriwe muri Ituri.
Gen Maj. Cirimwami yari ashinzwe ibikorwa by’ingabo z’igihugu mu ntara ya Kivu y’Amajyaruguru. Yimuriwe muri Ituri muri Nyakanga 2022, asimburwa na Lieutenant Général Philemon Yav. Hari hashize iminsi mike Cirimwami yambuwe imodoka y’akazi n’abarwanyi ba M23 muri Rutshuru.
Mulumba mu kiganiro Imvo n’Imvano cya BBC Gahuza, yatangaje ko kuva Gen. Maj. Cirimwami yimurirwa muri Ituri, urugamba rwagoye CMC n’indi mitwe yifatanyaga mu kurwanya M23 (ayita u Rwanda na Uganda), ndetse ngo Yav we yageragezaga kubaca indege kandi bari bufasha Leta.
Yagize ati: “Twamaze amezi ane turwana n’u Rwanda na Uganda hariya uturutse ku mupaka ukagera i Kibumba. Baza baturasa, bakananirwa, bagasubira inyuma. Byagenze ute rero? Commandement mu gisirikare cya FARDC yarahinduwe, Général witwa Cirimwami baramwimura, ni we wari ufashe neza igisirikare, FARDC igakora neza.”
Mulumba yakomeje ati: “Bamaze kumwimura, bashyizeho uwitwa Yav, Yav aratwirukana. Bashatse no kuturasa turi kurwanira igihugu, baratwirukana dusubira inyuma. Turi gutangira runo rugamba, hari aho M23 yagereje i Gitshanga, turarwana inkundura hafi amezi atatu, turi kubwira Leta ngo ‘Nyamara twashiriwe, tubuze kino’, ntabwo byigeze bikorwa kugeza ubwo Gitshanga yafashwe.”
Général Yav yatawe muri yombi muri Nzeri 2023 akekwaho ubugambanyi burimo gukorana na Leta y’u Rwanda. Ntabwo byamenyekanye niba imikoranire mibi hagati ye n’imitwe irimo CMC yaba iri mu byamufungishije.
