Umutwe mushya w’inyeshyamba urwanya ubutegetsi bw’u Rwanda wigambye ibitero bimaze iminsi byibasiye Intara y’Amajyepfo mu Karere ka Nyaruguru, mu Murenge wa Nyabimata. Uyu mutwe ukaba uvuga ko ugamije gukuraho ubutegetsi buriho mu Rwanda ukoresheje imbaraga.
Uyu mutwe wiyita mu magambo y’Icyongereza;National Liberation Forces (NLF) uyoborwa na Gen Habimana Hamada, urashinja ubutegetsi buriho mu Rwanda amacakubiri, guhonyora uburenganzira bw’abaturage, guhindura itegeko nshinga, kubangamira abatavuga rumwe n’ubutegetsi ngo no kunanirwa guca ubukene n’ubushomeri.
Itangazo ryashyizwe ahagaragara n’ihuriro, Rwandan Movement for Democratic Change (RMDC) riragira riti: “Kubw’ibyo twashinze umutwe wa gisirikare uzwi nka National Liberation Forces (NLF) tuwuha ubutumwa bwo kurangiza byihuse ubutegetsi bw’igitugu bwa RPF.”
Iri tangazo rikomeza rivuga ko NLF izakoresha uburyo bwose bushoboka burimo gukoresha intwaro mu gukura RPF ku butegetsi ngo kuko yanze inzira y’amahoro.
Ikinyamakuru cyo muri Uganda, Chimpreports dukesha iyi nkuru, kiravuga ko cyamenye ko ihuriro RMDC rigizwe na Paul Rusesabagina, wakomeje kwiyitirira kurokora abantu bari bahungiye muri Milles Collines mu gihe cya jenoside ndetse agakorwaho film yiswe Hotel Rwanda, nubwo hari ubundi buhamya bwagiye bugaragaza ibitandukanye n’ibi.
Kuwa 06 Mata 2006, perezida w’u Rwanda, Paul Kagame nawe akaba yarasabye Rusesabagina gushaka ibindi akinamo ikinamico akareka kubeshya yiyita intwari kuko ngo ari ibinyoma.
Intambara
Kuri ubu iyi nkuru irakomeza ivuga ko bigaragara ko Rusesabagina amaze igihe ashakisha abarwanyi bo kuzarwanya ubutegetsi buriho. Uyu akaba yungirijwe na Callixte Sankara ari nawe muvugizi w’uyu mutwe wa gisirikare wa RMDC.
Umuntu wa gatatu uri mu buyobozi ni Wilson Irategeka, ukuriye umutwe witandukanyije na FDLR, ishinjwa kugira uruhare muri jenoside yakorewe Abatutsi mu Rwanda mu 1994 mbere yo guhungira mu mashyamba ya Congo.
Chimpreports irakomeza ivuga ko kugeza ubu itarabasha kumenya niba hari ihuriro riri hagati y’uyu mutwe n’ishyaka RNC rya Kayumba Nyamwasa.
NLF rero nk’uko iyi nkuru ikomeza ivuga, yigambye ibitero biherutse kugabwa mu Karere ka Nyaruguru mu Ntara y’Amajyepfo, nyuma y’aho kuwa 01 Nyakanga Polisi y’Igihugu yasohoye itangazo rivuga ko amabandi yitwaje intwaro yagabye igitero mu giturage cya Cyamuzi, mu Kagali ka Ruhinga, mu Murenge wa Nyabimata, aho abateye ngo bibye abaturage barangiza bagasubira inyuma aho bari baturutse.
Itangazo uyu mutwe wo washyize ahagaragara rivuga ko bamaze kugaba ibitero muri Cyangungu, Nyamagabe, Nyaruguru, Bugesera na Huye, mu gihe abayobozi b’u Rwanda bo bavuga ko nta bitero bya gisirikare bazi mu bindi bice usibye muri Nyaruguru.
Iyi nkuru irakomeza ivuga ko ingufu n’aho ibikoresho uyu mutwe ukoresha biva hataramenyekana, ariko amafoto yashyizwe ahagaragara n’uyu mutwe aragaragaza inyeshyamba zawo zambaye amakoti y’imvura ndetse zifite n’imbunda harimo iziremereye n’amasasu.
Ubushobozi bw’uyu mutwe bwo kuba warwanya ubutegetsi bw’u Rwanda ntibuzwi ariko abayobozi b’u Rwanda bakomeje kuvuga ko abanzi b’igihugu bakomeje gushakisha abarwanyi hirya no hino.
Igihugu cy’u Burundi ni kimwe mu byo u Rwanda rwashinjije gucumbikira abashaka kurutera, nabwo bugahindukira bukavuga ko u Rwanda ari rwo rucumbikiye, rutoza kandi rugaha intwaro abarwanya ubutegetsi mu Burundi.
Kugeza ubu nta kidasanzwe igisirikare cy’u Rwanda kiratangaza ku bitero byavuzwe mu Karere ka Nyaruguru, gusa mu kiganiro yigeze guha Bwiza.com mu minsi yashize, umuvugizi w’ingabo z’u Rwanda, Lt Col Innocent Munyengango yatangaje ko abanzi b’u Rwanda aho baturuka hoe ikibazo cyabo kizakemuka.
Ibi biravugwa kandi mu gihe mu minsi ishize ubwo yasozaga amasomo ya gisirikare kuri ba ofisiye bato mu cyumweru gishize, perezida Kagame yabwiye abasoje aya masomo ko ibihe biri imbere bitoroshye ndetse akavuga ko u Rwanda rwiteguye intambara niramuka irushojweho.
Lt Col Emmanuel Nyirihirwe, umuyobozi w’ingabo muri Nyaruguru avuga ko abateye ari abacengezi kandi bahashyijwe bagasubira aho bari baturutse.
Ibi yabitangarije mu kiganiro cy’abashinzwe umutekano n’abategetsi mu nzego z’ibanze n’abanyuze mu itorero hafi ya bose mu cyiswe Isangano ry’Intore mu Karere ka Nyaruguru mu mpera z’icyumweru gishize.
Lt Col Nyirihirwe akaba yaragize ati: “ Nta kintu kidasanzwe navuga gihari, kuko muri ibyo bikorwa byose byabaye, abasirikare cyangwa inzego z’umutekano, zifatanyije namwe, twabyitwayemo neza, n’abari bagabye icyo gitero; ari bo mwise abacengezi cyangwa hadui mu rurimi rwacu, turabahashya, basubira iyo bari baturutse, dore ko bari baturutse muri ririya shyamba (Nyungwe) .”
Lt Col Nyirihirwe yakomeje avuga ko kugeza ubu hari byinshi byakozwe mu kubungabunga umutekano muri Nyaruguru birimo kohereza ingabo nyinshi zagombaga gushakisha abo bahungabanyaga umutekano nubwo atahishe ko hari bamwe mu baturage bafashije abo bantu bagabye ibitero mu buryo bumwe cyangwa ubundi.
