Umuvugizi w’inyeshyamba za FDLR, LaForge Fils Bazeye, yafatiwe muri Repubulika Iharanira Demokarasi ya Congo.
Nk’uko byatangajwe n’Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, abicishije ku rukuta rwe rwa Twitter, avuga ko Fils Bazeye yafashwe n’igisirikare cya Congo (FARDC) by’umwihariko ngo akaba ashobora koherezwa mu Rwanda.
Yagize ati “…. Uyu munsi yafashwe n’ingabo za Congo (FARDC), ndizera ko azoherezwa mu Rwanda”.
Umutwe w’inyeshyamba za FDLR umaze imyaka igera kuri 24 urwanira ku butaka bwa Congo, ukaba ugizwe na bamwe bashinjwa kugira uruhare muri jenoside yakorewe Abatutsi mu Rwanda mu 1994.
LaForge Fils Bazeye atawe muri yombi nyuma y’icyumweru kimwe bitangajwe ko izi nyeshyamba zagabye igitero mu Rwanda, Intara y’Iburengerazuba, mu Karere ka Rubavu, umurenge wa Busasamana, mu mirwano yabaye hagati yazo hakaba harapfiriyemo abasirikare batatu b’u Rwanda, n’abarwanyi icyenda ba FDLR.
