Kuri uyu wa Gatatu, itariki 20 Werurwe, wari Umunsi Mpuzamahanga wa Francophonie. Ibirori byinshi by’umuco byari byateguwe mu bihugu bivugwamo Igifaransa. Ariko muri Repubulika ya Demokarasi ya Congo, banze kwizihiza uyu munsi kubera umubano utifashe neza hagati ya Kinshasa n’Umunyamabanga Mukuru wa La Francophonie, Louise Mushikiwabo, kubera gusa ko ari Umunyarwandakazi. Ibi OIF yagize icyo ibivugaho ibinyujije ku muvugizi wa Mushikiwabo, Oria Vande Weghe.
Mu kiganiro yagiranye na RFI yabajijwe uko bakiriye kuba Repubulika ya Demokarasi ya Congo nk’igihugu cya mbere gikoreshwamo Igifaransa cyane muri Afurika, yanze kwizihiza Umunsi wa Francophonie.
Yasubije agira ati « Umva, yego, twamenye iki cyemezo cya RDC ejo. Twavuga iki? Sinzi niba biterwa n’ubwenegihugu bw’Umunyamabanga mukuru wacu, cyangwa kubera ko u Rwanda ari igihugu kinyamuryango wacu. Ariko ugomba kumenya ko 20 werurwe, ari umunsi mpuzamahanga wa La Francophonie, ntabwo ari ibirori bya politiki, ahubwo ni ibirori by’abaturage. Ibihugu, abaturage, ibigo, amashuri… Isi yose y’umuco yishimira kuba ahantu havuga Igifaransa. Ku giti cyanjye, sinzi neza ko mbona isano iri hagati yo kwizihiza 20 Werurwe n’uburyo ubwo ari bwo bwose bwo gutukwa muri politiki. Noneho, kuvuga ko Umuryango unengwa gufata uruhande, ndashaka kumenya ishingiro ry’ibivugwa. Ntabwo ntekereza ko hari uruhande rwafashwe kugeza ubu, biratandukanye cyane. Umunyamabanga mukuru yavuze neza inshuro nyinshi kugirango ashishikarize inzira y’ibiganiro, ndatekereza rero ko, uko byagenda kose, tutagomba kwitiranya politiki n’ubuzima bw’abaturage. Abavuga Igifaransa benshi muri RDC bakwiriye kwishimira ururimi rwabo kandi no kuba mu muryango uvuga urwo rurimi. »
Umunyamakuru yabajije ati « Ibyo twumva byinshi i Kinshasa ni ibirego kuri Madame Louise Mushikiwabo, kubera ko atari gukoresha umwanya we wo kuba umunyamabanga mukuru ngo agerageze guhuriza hamwe ibihugu byombi, u Rwanda na Congo, mu gihe Francophonie igomba kuba urubuga rwo kugisha inama n’ibiganiro kuri politiki ».
Vande Weghe yasubije agira ati « Ariko ibi biganiro bibaho mu nzego zacu. Ntekereza ko iyi ngingo igibwaho impaka buri gihe muri komite zacu za politiki zitandukanye. Byaganiriweho ku rwego rwo hejuru mu nama ya Djerba mu 2022. Ndatekereza ko hari ukutumva neza uruhare rw’umunyamabanga mukuru. Ndabibutsa ko turi ubunyamabanga bw’ibihugu kandi ko ibikorwa bya politiki mu by’ukuri biterwa cyangwa, bitegekwa n’inama y’ibihugu isaba OIF kugira icyo ikora mu buryo bumwe cyangwa ubundi. Ntabwo rero, bidashoboka ko habaho igikorwa, uko byagenda kose nta bushake bwo kutabigiramo uruhare, ahubwo bitandukanye cyane n’ibyo. Ndatekereza rero ko hari urujijo rushobora gutezwa ku byerekeye umunyamabanga mukuru ku giti cye. »
Uragira uti: « Ntibivuze ko hatabaho ibikorwa.” Uravuga ko Louise Mushikiwabo ashobora gufata ingamba za diplomasi? »
Yasubije ati « Oya, icyo mvuga nuko ari ah’ ibihugu bireba kugisha inama, guhurira hamwe no kubaza Francophonie, nkuko bimeze ku bindi bibazo byose bibera mu Isi ivuga Igifaransa, aho Leta birimo zidusaba kubigiramo uruhare. Hariho inzira yose igomba gukurikizwa. Icyo nshaka kuvuga nuko bidakuyeho ko ibyo byaba. Kuri ubu, Francophonie yisobanuye inshuro nyinshi. Habayeho amatangazo, kandi, kuri ubu, simbona isano iri hagati y’umunsi mpuzamahanga wa La Francophonie kuri iki cyiciro n’inzira ya politiki igomba kubaho.
Abajijwe niba kuba Mushikiwabo yarabaye minisitiri w’ububanyi n’amahanga w’u Rwanda ubwabyo bidashobora gutuma yirinda kwivanga muri ibi bibazo by’ibihugu byombi, yasubije ati « Birumvikana cyane, hari hakwiye kubaza abayobozi icyo batekereza. Ariko biragaragara ko umwanya we wo kuba uwahoze ari Minisitiri w’ububanyi n’amahanga, byanze bikunze, bituma yitirirwa gufata uruhande, birumvikana ».
Abajijwe niba ibyo bidashobora gutuma nyine abura icyo akora nk’umuhuza, nk’umucurabwenge w’ibiganiro, Vande Weghe yagize ati « Simbitekereza. Ndibwira ko habaye ubushake bwa Francophonie bwo kugira uruhare muri RDC. Ndatekereza cyane cyane mu matora aheruka yo muri 2023, aho Francophonie yatumiwe nk’indorerezi. Hanyuma, amaherezo, aho igihugu kitemereye ubwo burorerezi bw’amatora ko bukora muri conditions nziza. Ndibwira ko hari igice cy’imikino ya 2023 ya Francophonie nayo dushobora kuyivuga, aho Umunyamabanga Mukuru yatumiwe, hanyuma akamburwa ubutumire. Mu by’ukuri rero, ndatekereza ko, ku ruhande rw’abategetsi ba Congo, rwose hari ikintu gifitanye isano n’ubwenegihugu bw’umunyamabanga mukuru kibabaje kuko uyu munsi, ntabwo ari minisitiri w’ububanyi n’amahanga w’u Rwanda, ni Umunyamabanga Mukuru wa La Francophonie, ibihugu byombi by’u Rwanda na RDC bibarizwamo. »
Ku kijyanye no kuba bashinja u Rwanda gufasha M23, ngo ibihugu bitandukanye na Loni bakaba barabyamaganye ariko Mushikiwabo ngo akaba atamagana ubwo bufasha, yasubije agira ati « Umunyamabanga mukuru yahamagariye impande zose kubahiriza inzira ya Nairobi y’ibiganiro n’imishyikirano. Ijwi rya Francophonie rero ryahoze ari ibiganiro, kugisha inama, rwose ntabwo ari amakimbirane. Ibi rero yabivuze inshuro nyinshi. »
