Iburanisha ku ifunga n’ifungurwa ry’abantu 6 barimo umunyamakuru Nsengimana Théoneste wa Umubavu TV n’abayoboke b’ishyaka DALFA Umurinzi ritaremerwa mu Rwanda ryasubitswe batarasomerwa ibyaha baregwa.
Tariki ya 14 Ukwakira 2021 ni bwo urwego rushinzwe ubugenzacyaha, RIB, rwatangaje ko rwataye muri yombi abantu batandatu (6) barimo Nsengimana, bakurikiranweho gutangaza amakuru y’ibihuha agamije guteza imvururu n’imidugararo muri rubanda.
Kuri uyu wa 28 Ukwakira bagejejwe mu rukiko rw’ibanze rwa Kagarama ruherereye mu Karere ka Kicukiro, Me Gatera Gashabana ubunganira muri uru rubanza asaba ko iburanisha risubikwa kuko dosiye y’abo yunganira yayibonye ejo ku wa 27 Ukwakira.
Nk’uko BBC yabitangaje, Me Gashabana yavuze ko mu bo yunganira hari ababonye dosiye yabo uyu munsi, amenyesha urukiko ko abo batakwiregura batabanje kuyisoma.
Inzitizi y’abaregwa yumvikanye, urukiko rwimurira iburanisha tariki ya 2 Ugushyingo 2021 kugira ngo babone umwanya wo gusoma dosiye zabo.
