Urukiko rwo muri California kuwa Mbere rwategetse uruganda rw’imodoka rwa Tesla kwishyura hafi miliyoni 137$ y’indishyi z’akababaro uwahoze ari umukozi warwo, kubera gufunga amaso ku ivangura rishingiye ku ruhu yakorerwaga muri uru ruganda.
Owen Diaz yahawe akazi binyuze mu kigo gishinzwe gushaka abakozi, yakoraga akazi ko kuzamura imizigo hagati ya Kamena 2015 na Nyakanga 2016 mu ruganda rukora imodoka zikoresha amashanyarazi rwa Fremont (California), aho yagiye atukwa ibitutsi by’ivangura ndetse n’umwuka yakoreragamo utari mwiza, nk’uko bigaragara mu nyandiko z’urukiko.
Mu rubanza, Diaz yasobanuye ko Abanyamerika birabura bakora muri uru ruganda rwa Tesla n’umuhungu we yakoragamo, bakunda guhimbwa amazina ashingiye ku ivanguraruhu ndetse no guteshwa agaciro.
Ikirego kikavuga ko “Ishusho ya Tesla yo gutera imbere ihishe indi sura yo gutesha agaciro abakozi bayo b’Abirabura b’Abanyamerika,”
Diaz yavuze ko nubwo ibibazo bye yabigezaga ku buyobozi, Tesla ntacyo yakoze ngo ihagarike iryo vanguraruhu ryabaye akamenyero.
Nk’uko ikinyamakuru Bloomberg News kibitangaza ngo kuwa Mbere, Urukiko rwa San Francisco rwemeje ko Diaz agomba guhabwa indishyi ya miliyoni 136.9 z’amadolari y’Amerika, nk’uko byemejwe n’umwunganizi we, Lawrence Organ.
Avugana na Washington Post, Lawrence yagize ati “Twishimiye gusa ko inteko y’abakemurampaka (jury) yabonye ukuri ikanashyiraho umubare uzasunika Tesla,”
Ku ruhande rwa Tesla, visi perezida ushinzwe abakozi, Valerie Capers Workman, yemeye ko umwuka “utari mwiza” ku ruganda rwa Fremont, aho abandi bakozi bahamya ko “bahoraga bumva ibitutsi by’ivangura”, harimo n’ijambo “nigger”.
Ku bwe, ngo aba bakozi bavuze ko “akenshi batekerezaga ko iyi mvugo yakoreshejwe mu buryo bw ‘urugwiro’ kandi muri rusange na bagenzi be b’Abirabura b’Abanyamerika.
Ibi bikaba bishoboka kuko muri Amerika iyo umwirabura yise mugenzi we ‘Nigger’ ntabwo kiba ari igitutsi ariko iyo umuzungu amwise ‘Nigger’ bihita biba igitutsi, gusa Abazungu na bo barabizi ko ariko bimeze ubikoze aba afite ikindi agamije.
