Abategetsi ba Leta Zunze Ubumwe za Amerika kuri uyu wa kabiri batangaje ko bataye muri yombi uwahoze ari perezida wa Peru, Alejandro Toledo, ku busabe bw’igihugu cye kimukurikiranyeho ibyaha bya ruswa.
Minisiteri y’ubutabera ya Leta Zunze Ubumwe za Amerika yavuze ko Toledo yafatiwe muri Leta ya ya California ari naho azamenyesherezwa n’urukiko ibijyanye no kwoherezwa mu gihugu cye mu mpera z’iki cyumweru.
Inkuru dukesha Ijwi rya Amerika iravuga ko Alejandro Toledo yafashwe yasuye Kaminuza ya Stanford.
Ubutabera bwa Peru bushinja Toledo kuba yarahawe n’ikigo cy’ubwubatsi cyo muri Brazil ruswa ingana na miliyoni 20 z’Amadolari y’Abanyamerika kugirango gihabwe isoko ryo kubaka umuhanda uhuza Peru na Brazil.
Alejandro Toledo uhakana ibi birego, yayoboye Peru kuva mu 2001 kugeza mu 2006.
