Uwanja wa Amahoro, mojawapo ya viwanja vya kisasa zaidi barani Afrika, umeorodheshwa kati ya viwanja 23 vinavyowania tuzo ya Viwanja Bora Duniani ya 2024, kwa mujibu wa tovuti ya StadiumDB.com.
Uwanja huu wa Rwanda ulizinduliwa rasmi tarehe 1 Julai 2024, katika hafla iliyoongozwa na Rais Paul Kagame, pamoja na Rais wa Shirikisho la Soka Afrika (CAF), Dkt. Patrice Motsepe, na Wanyarwanda mbalimbali.
Tangu mwaka 2010, StadiumDB.com imekuwa ikitoa tuzo kwa viwanja vipya vilivyojengwa, kwa kuzingatia kura za mashabiki wa michezo duniani kote.
Mwaka huu, Uwanja wa Amahoro unashindana na viwanja mashuhuri kama vile Santiago Bernabéu wa Real Madrid (Hispania), Egypt Stadium (Misri), Kingdom Arena (Saudi Arabia), na Linyi Olympic Sports Park Stadium (China), kati ya vingine.
Uwanja wa Amahoro una uwezo wa kuchukua watu 45,000, umejengwa kwenye eneo la mita za mraba 75,000 na una urefu wa mita 40. Ujenzi wake uligharimu dola milioni 160 na unakidhi viwango vya CAF na FIFA.
Wanaotaka kupiga kura kwa ajili ya Uwanja wa Amahoro wanaweza kufanya hivyo kupitia tovuti ya StadiumDB.com kabla ya tarehe 3 Machi 2025.
