Ubundi bavuga ko uduhigo tuberaho guhigurwa. Gusa iyi yumvikana nk’imvugo ibiba ikizere, kandi koko ni byiza, gusa muri shampiyona y’umukino wa Basktball muri Amerika y’Amajyaruguru (NBA) ho hari uduhigo twashyinguwe ku gasongero k’ubuhangange bizagorana gukuraho. Abahungu batereye mu nkangara karahava, abandi bakina imikino n’iminota y’umurengera.
1.Amanota menshi y’umukinnyi umwe mu mukino umwe yageze ku 100
Ku wa 2 Werurwe 1962, umukinnyi witwa Wilt Chamberlain yatsinze amanota 100 mu manota 162-147 Philadelphia Warriors yatsinze New York Knicks. Ibi byatumye aca n’agahigo mu mwaka w’imikino wa 1961-62 k’impuzandengo y’amanota 50.2 kuri buri mukino yakiniye Philadelphia Warriors.
Ni ibintu bitarakorwa n’undi muntu uwo ari we wese kugera n’ubu. Cyakoze umuntu uyingayinga aka gahigo ka Chamberlain ni Kobe Bryant watsinze Raptors amanota 81 muri 2006.
2. Gutsinda amanota 50 mu mukino umwe inshuro 118
Michael Jordan yatsinze amanota 50 inshuro 31, Isi yose icika ururondogoro (inshuro 30 akinira Chicago Bulls ndetse n’indi akinira Wizards). Ibi byasaga no kwirengagiza ko Chamberlain yakubye Michael Jordan inshuro 4, kuko we yatsinze amanota 50 inshuro 118.
Ikirenze kuri ibi, ni uko muri izo nshuro zose 32 muri zo yatsindaga amanota 60 kuzamura. Uduhigo twinshi twa Chamberlain dushingiye ku gushyira mu nkangara.
3. Gukina imikino 1192 yikurikiranya nta n’umwe usibyemo
A.C Green yakinnye imikino 1192 nta mukino n’umwe asibyemo, ibi byatumye bamwita “umugabo w’icyuma” (Ironman). Kuva mu 1987-2001, nta mukino n’umwe yasibye.
Muri iki gihe kingana n’imyaka 16 Green yatwaye ibikombe 3 hamwe na Los Angeles Lakers.
4. Gutanga imipira 30 yavuyemo amanota mu mukino umwe
N’ubwo Scott Skiles bitagenze neza nk’umutoza, ariko izina rye ryanditse mu gitabo cy’uduhigo. Kuwa 30 Ukuboza 1990, ubwo yakiniraga Orlando Magic, yazonze cyane ikipe ya Denver Nuggets ayitsinda amanota 22, anatanga imipira 30 yavuyemo amanota mu ntsinzi ya 155-116.
Ubwo Skiles yari aciye agahigo ka Kevin Porter mu 1978, aho yatanze imipira 29 yabyaye amanota, bityo aba umukinnyi wa mbere wari ubikoze mu mateka ya NBA.
5. Gutsinda amanota 107 mu gice kimwe
Mu mwaka w’imikino w’1999-1991, ikipe ya Phoenix The Suns yatsinze Denver Nuggets amanota 107 mu gice kimwe. Agace ka mbere muri tune tw’umukino karangiye ari amanota 50, aka kabiri karangira ari 57.
Igice cya mbere cyarangiye habonetse amanota 174 muri rusange, dore ko Denver Nuggets nayo yari yatsinze amanota 67.
