Umutegetsi mukuru muri Israheli aravuga ko hari ubushake bwo kureba ibindi byakwifashishwa mu kigwi cy’imashini zitavugwaho rumwe Israheli yashyize ku butaka butagatifu bwa Yeruzalemu mu rwego rw’umutekano.
Jenerali Majoro Yoav Mordechai yasabye abayisilamu gutanga ibindi bitekerezo ku cyakorwa mu rwego rwo guhangana n’ikibazo cy’ubushyamirane bushingiye kuri Yeruzalemu bwiyongereye mu minsi ibiri ishize.
[xyz-ihs snippet=”google-pub”]
Igihugu cya Israheli cyashyizeho izo mashini zigenzura ko hari uwitwaje icyuma nyuma yaho abapolisi babiri ba Israheli biciwe hafi y’aho hantu mu ntangiriro z’uku kwezi.
Izo ngamba zarakaje Abanyapalestina, bashinja Israheli kugerageza kwigarurira ahantu hatagatifu.
Ubushyamirane bushingiye kuri aho hantu , buzwi nka Haram al-Sharif ku bayisilamu cyangwa Temple Mount ku bayahudi bwariyongereye mu minsi nk’ibiri ishize.
Jenerali Majoro Mordechai yabwiye ishami rya BBC ritangaza amakuru mu rurimi rw’Icyarabu ko harebwa ubundi buryo bwakwifashishwa.
Ati”Twizeye ko igihugu cya Jordan n’ibindi bihugu by’Abarabu bishobora gutanga ikindi gisubizo cy’umutekano kuri iki kibazo”.
Yongeyeho ati “Igisubizo icyo ari cyo cyose, cyaba gishingiye kuri za mudasobwa cyangwa ku ikoranabuhanga rigezweho. Dukeneye igisubizo cy’umutekano. Ntabwo dukeneye igisubizo cya politiki cyangwa gishingiye ku iyobokamana”.
Alan Johnston, umunyamakuru wa BBC ukirikiranira hafi ibibera mu burasirazuba bwo hagati, aravuga ko iki kibaye ikimenyetso cya mbere cya Israheli cyo kudohora ingamba cyafashe.
Ku wa gatandatu, inzego zishinzwe umutekano za Palestina n’iza Israheli zakozanyijeho. Abanyapalestina bagera kuri bane barishwe mu myigaragambyo yabaye mu minsi ibiri ishize.
[xyz-ihs snippet=”google-pub”]
Ku wa gatanu, abaturage batatu ba Israheli bishwe batewe ibyuma mu rusisiro ruri hafi y’agace ka Ramallah, muri West Bank.
Kubera uburemere bw’iki kibazo, ku wa mbere, akanama k’umutekano mu muryango w’abibumbye karateganya guhura mu rwego rwo guhagarika urwo rugomo.
Kanda hano ujye ubona amakuru yihuse kandi kugihe kuri Facebook no kuri twitter
Ntakirutimana Deus@gmail.com
