Leta ya Zimbabwe yafashe icyemezo cyo kutazongera guhemba abakozi bayo batikingije icyorezo cya Covid-19 mbere y’igihe ntarengwa yari yarabahaye.
Tariki ya 14 Nzeri 2021, abakozi ba Leta batarikingiza iki cyorezo bari bahawe ukwezi kumwe ko kuba bamaze kwikingiza; kwagombaga kurangira tariki ya 14 Ukwakira.
Byari bigendanye n’intego iki gihugu cyihaye yo gukingira byibuze 60% muri uyu mwaka, ariko ikomwa mu nkokora n’imyumvire ya bamwe bangaga kwikingiza.
Nyuma y’aho igihe ntarengwa kigeze, Umunyamabanga wa Leta ushinzwe ubuzima, Jasper Chimedza yamenyesheje abakozi bose ko ubu uwemerewe kujya mu kazi ari ufite icyemezo kigaragaza ko yikingije.
Chimedza yagize ati: “Abakozi batazerekana icyemezo cy’uko bakingiwe ntabwo bazemererwa kujya mu kazi, mu rwego rwo gukurikiza ibwiriza rya Guverinoma rwo kyrwanya ikwirakwira n’ingaruka z’icyorezo cya Covid-19.”
Kandi ngo utazajya mu kazi, nta mushahara azahabwa. Chimedza yabisobanuye ati: “Abatazajya mu kazi ka buri munsi kubera ko batubahirije ibwiriza, bazafatwa nk’abagasibye kandi ibihano bizabafatirwa.”
Ibihano bizafatirwa abatajya muri aka kazi, ngo nta bindi bitari ukudahembwa umushahara.
Muri Zimbabwe hamaze gukingirwa abantu miliyoni 2.5 muri 15 z’abari muri iki gihugu. Leta ifite intego yo kuba imaze gukingira byibuze 60% muri uyu mwaka.
