Kuri uyu wa gatanu, tariki ya 26 Mata 2024 mu gace ka Masisi ahazwi nka Kironko haramukiye imirwano ikaze hagati y’ingabo za Kongo,Wazalendo n’abarwanyi ba M23.
Muri iyi mirwano nta makuru arambuye atangwa y’uwaba yagabye igitero mbere, gusa ikivugwa cyo n’uko ngo habayeho uguturika kw’intwaro ziremereye zumvikanye muri kariya gace bituma abaturage bahunga bagenda berekeza i ’Buguri’ no mu turere tuyikikije.
Iyi mirwano yabereye i Masisi, yari yabanjirijwe n’indi yabereye mu gace ka Rwindi ho muri teritware ya Rutshuru mu masaha ya saa sita z’igicuku.Amakuru avuga ko urwo rugamba rwari rukaze kuko ngo ingabo za FARDC n’abo bakorana basubijwe inyuma ndetse M23 ibambura intwaro nyinshi.
Hari hashize iminsi hatumvikana imirwano yeruye ihuza izi mpande zombi, ahubwo havugwa ibisa n’uduteroshuma nabwo tudakanganye, ariko kuri iyi nshuro ngo imirwano yabaye yari iremereye n’ubwo ngo nyuma yo guhunga kwa FARDC yahise ihosha.
Tanga igitekerezo