Imikino y’umunsi wa 18 wa shampiyona y’ikiciro cya mbere hano mu Rwanda yabaye kuri uyu wa gatandatu, isize ikipe ya Rayon Sports inyagiye Espoir FC ibitego 3-0, mu gihe mukeba wayo APR FC inganyirije na Etincelles FC igitego 1-1.
Rayon Sports yari yakiriye Espoir FC kuri Stade ya Kigali I Nyamirambo, iyihatsindira ibitego 3-0. Ni umukino iyi kipe ifitwe n’umutoza Alain Kirasa yarushijemo Abanya-Rusizi ku buryo bugaragara.
Igice cya mbere cy’uyu mukino cyarangiye Rayon Sports ifite ibitego 2-0 byombi byatsinzwe na Bizimana Yannick, mbere y’uko Mugisha Girbelt atsinda agashinguracumu ku munota wa 84 w’umukino.
I Rubavu Nshuti Innocent yari yatsindiye APR FC igitego ku munota wa 20 w’umukino ku mupira yari ahawe na Danny Usengimana, gusa Niyibizi Ramadhan aza kukishyura ku munota wa 90 w’umukino.
Etincelles FC yakinnye iminota myinshi y’uyu mukino ifite abakinnyi 10 mu kibuga, dore ko ku mu nota wa 22 Akayezu Jean Bosco yari yeretswe ikarita itukura azira gukinira nabi Manzi Thierry.
Umunsi wa 18 wa shampiyona usize APR FC ikiyoboye urutonde rwa shampiyona n’amanota 42, mu gihe Rayon yakomeje gusigasira umwanya wa kabiri n’amanota 38.
Hanabaye umukino wa Marines FC na Heroes FC urangira amakipe yombi aguye miswi 0-0.
Tanga igitekerezo