Ku wa Gatanu tariki ya 31 Kanama 2018, abantu batanu bo mu gace ka Kakuka, Teritwari ya Irumu, ihana imbiri na Ituri muri Repubulika Iharanira Demokarasi ya Congo, bishwe n’inyeshyamba bicyekwa ko ari iza ADF zikomoka muri Uganda.
Nk’uko bitangazwa n’umuyobozi w’uduce Banyari/Tchabi, Baba Nilau Tchabi, avuga ko izi nyeshyamba zageze muri ako gace zikarasa amasasu menshi, abasivile bane bakahasiga ubuzima hamwe n’umusirikare umwe wa FARDC.
Nk’uko Radiyo Okapi ibitangaza, ngo mu basivile bishwe harimo abagore babiri n’abana babiri, naho abasirikare babiri ba FARDC bakaba bakomeretse bikomere bahita boherezwa kuvurirwa mu bitaro bya Boga.
Mu gihe abaturage bo muri aka gace ngo bafite ubwoba bw’uko izi nyeshyamba zakongera kubagabaho ibitero, ngo abasirikare ba Leta baturutse i Kainama muri Kivu y’Amajyaruguru bazigabyeho ibitero ziva muri aka gace.
Abaturage ngo bahungiye mu kandi gace ka Boyo, igisirikare cyo kikaba gitanga ihumure ko izi nyeshyamba zasubijwe inyuma.
Inyeshyamba za ADF/Nalu zikomoka muri Uganda, zagiye zishyirwa cyane mu majwi zishinjwa kwica abasivile cyane cyane abo mu gace ka Beni zibicishije intwaro za gakondo n’amasasu.
