Urukiko rwisumbuye rwa Ngoma rwafashe umwanzuro rwasomye mu ruhame maze rwemeza ko abakozi batanu mu bahoze ari abakozi b’ibitaro bya Gahini hamwe na ba rwiyemezamirimo babafashije , bahamwe n’ibyaha birimo icyo kurigisa umutungo wa Leta, bahanishwa ibihano by’igifungo, ihazabu ndetse no kugarura umutungo wa Leta bafatanyije kurigisa ungana na 374.703.987frw.
Urukiko rwemeje ko byarakozwe ku bufatanye bw’abavuzwe haruguru banifashishije ba rwiyemeza mirimo batandukanye. Abakozi bafatanyije na ba rwiyemezamirimo basabwe kugarura amafaranga angana na 374 703 987Frs.
Urukiko rwategetse ko:
Muvunyi Alphonse wahoze ayobora ibitaro bya Gahini, Rusingiza Theobald wari uhagarariye ubucungamutungo (Chef Comptable) , Rubulika Gerard wari Administrateur na Kadege Felix wari Superviseur bahamwa n’icyaha cyo kurigisa umutungo wa Leta n’ubufatanyacyaha muri icyo cyaha, ungana na 374.703.987frw rubahanisha igihano cy’igifungo cy’imyaka 8 buri wese n’ihazabu ya 850.461.294frw.
Rwiyemezamirimo Kalisa Emmnuel ufite kampani y’ubwikorezi yitwa ‘Sun Express Ltd’ ahamwa n’icyaha n’ubufatanyacyaha mu cyaha cyo kurigisa umutungo ahanishwa igifungo cy’imyaka 3 n’ihazabu ya 2.000.000frw akanasubiza Leta amafaranga angana na 10.210.231frw naho Sun Express ihezwa mu masoko ya Leta mu gihe cy’imyaka 5.
Rwiyemezamirimo NZARUBARA norman ufite papeterie yitwa ‘Papeterie Nor’ ahamwa n’ubufatanyacyaha mu cyaha cyo kurigisa umutungo ahanishwa igihano cy’igifungo cy’imyaka 3 n’ihazabu ya 2.000.000frs runategeka ko asubiza amafaranga ya Leta angana na 40.316.429frw naho Papeterie Nor ihezwa mu masoko ya leta mu gihe cy’imyaka 5.
Urukiko kandi rwahanaguye ibyaha kuri Musimwa Belyse wari Cachier na Niyikiza Jean Paul wari assistant comptable muri ibi bitaro.
Nk’uko byatangajwe ku rubuga rw’Ubushinjacyaha bukuru, ngo Ubushinjacyaha bwari bukurikiranyeho Dr. Muvunyi Alphonse wahoze ayobora ibitaro bya Gahini, Rubulika Gerard wahoze ari Administrateur, Kadege Felix wari Superviseur na Rusingiza Theobald ukora nka chef Comptable kuba ku matariki atandukanye y’imyaka itatu y’ingengo y’imari, 2013-2014; 2014-2015; na 2015-2016 ibitaro bya Gahini byagiye bihabwa amafaranga n’abaterankunga angana na 785,755,061frws, atariko yakoreshejwe ibyo yari agenewe.
Byayahawe ngo akoreshwe ibikorwa bitandukanye by’ubuvuzi birimo ubukangurambaga, amahugurwa ndetse n’inama ku ndwara zitandukanye n’ibindi birimo no kugura ibikoresho, aya mafranga rero yaje gukoreshwa nabi nk’uko byagaragajwe n’itsinda ry’abagenzuzi ba RBC na MINECOFIN.
Ryasanze hararigishijwe angana na 470,757,597frw, maze iperereza rikozwe rigaragaza ko ibimenyetso bigaragaza ko hanyerejwe angana na 425.230.647frw hakoreshejwe inyandiko mpimbano n’amalisiti y’abitabiriye amahugurwa agaragaraho abantu batagira imyirondoro, abiganiwe imikono, abantu batabaho ba baringa, bitiriwe inzego zitandukanye,…
Muri bo, harimo n’abatararebwaga n’ibyo bikorwa, za ordre de mission zahimbwe zigaragazwa ko zatanzwe n’ibigo bitandukanye nyamara ataribyo, hakaba harahimbwe za cachet zateweho, invoices z’impimbano amasezerano y’amasoko y’amahimbano atarabayeho, n’izindi nyandiko zitandukanye zahimbwe hagamijwe kugaragaza ko amafranga yakoreshejwe nyamara atari byo, byose ngo bikaba byarakozwe ku bufatanye bw’abavuzwe haruguru banifashishije ba rwiyemezamirimo batandukanye.
