Leta ya Repubulika Iharanira Demokarasi ya Congo yashoye amafaranga menshi mu bikorwa byo gushaka ubuvugizi muri Leta Zunze Ubumwe za Amerika, mu gihe ikomeje urugamba rwa dipolomasi ku kibazo cy’umutekano muke mu Burasirazuba bw’igihugu.
Ikinyamakuru Financial Times kivuga ko RDC iri mu bihugu bya Afurika byifashishije ibigo bya ‘lobbying’ by’i Washington, kugira ngo biyifashe kugera ku bayobozi n’abafata ibyemezo muri Amerika.
Amakuru avuga ko RDC yishyuraga abarirwa muri $ 100,000 ya buri kwezi agenewe ibyo bikorwa. Aya mafaranga angana na $ miliyoni 1.2 (asaga miliyari 1.6 Frw).
Kinshasa yashoye ariya mafaranga mu gihe yashakaga kongera ijwi ryayo mu murwa mukuru wa Amerika, cyane cyane ku kibazo cy’intambara yo mu Burasirazuba bwa RDC, aho ishinja u Rwanda gushyigikira umutwe wa AFC/M23.
Kigali yahakanye ibyo birego kenshi, yo ikavuga ko ikibazo cy’umutekano mu karere gifite imizi mu bibazo bitarakemuka birimo n’imikoranire ya Congo Kinshasa n’umutwe wa FDLR.
RDC ishaka iki i Washington?
Ubu bukangurambaga bwo gushaka ubuvugizi bugamije gufasha RDC gusobanurira abayobozi b’Abanyamerika uko ibona ikibazo cy’umutekano wayo, gushaka ubufatanye bwa dipolomasi no gukurura ishoramari.
Washington yabaye umwe mu bakinnyi bakomeye mu gushaka umuti w’amakimbirane yo mu Burasirazuba bwa RDC, aho yagize uruhare mu nzira z’ibiganiro birimo n’amasezerano y’amahoro.
Umukino wa dipolomasi hagati ya Kinshasa na Kigali
Mu gihe RDC yashakaga kongera imbaraga zayo i Washington, u Rwanda na rwo rwakomeje guhangana n’ibirego bya Kinshasa n’imiryango imwe mpuzamahanga ku ruhare rushinjwa mu kibazo cya M23.
Kigali ivuga ko idashyigikiye umutwe uwo ari wo wose ugamije guhungabanya ubusugire bwa RDC, ariko igashimangira ko ikibazo cy’umutekano mu Burasirazuba bwa Congo kidakwiye kwirengagiza ikibazo cya FDLR n’amateka y’umutekano mu karere.
Kinshasa yanenzwe ku gukoresha ariya mafaranga
Abanenga ikoreshwa ry’ayo mafaranga bavuga ko amafaranga angana atyo yashoboraga gukoreshwa mu guteza imbere imibereho y’abaturage, mu gihe RDC igihanganye n’ibibazo by’ubukene, ibikorwa remezo bidahagije n’umutekano muke mu bice bimwe by’igihugu.
Gusa abashyigikira ibikorwa bya lobbying bavuga ko mu rwego mpuzamahanga, igihugu kigomba kugira uburyo bwo gusobanura aho gihagaze no gushaka ubufasha ku bibazo bireba inyungu zacyo.
Kuri RDC, gukoresha amafaranga menshi mu gushaka ijwi i Washington byabaye kimwe mu bikoresho ikoresha mu rugamba rwa dipolomasi, mu gihe ikibazo cya M23 n’umubano wayo n’u Rwanda bikomeje kuba ku isonga mu biganiro mpuzamahanga.
