Amashyirahamwe umunani akomeye ahagarariye ba nyiri amato n’ibigo bikora ubwikorezi bwo mu nyanja ku isi yasabye Umuryango w’Abibumbye (Loni) kwamagana umugambi wo kwishyuza amafaranga amato anyura mu nyanja ya Hormuz, avuga ko byabangamira ubukungu bw’isi ndetse bikica amategeko mpuzamahanga agenga urujya n’uruza rwo mu nyanja.
Mu ibaruwa yohererejwe Umunyamabanga Mukuru wa Loni, António Guterres, ndetse n’Umunyamabanga Mukuru w’Umuryango Mpuzamahanga ushinzwe Ubwikorezi bwo mu Nyanja (IMO), Arsenio Dominguez, ayo mashyirahamwe yavuze ko gushyiraho amafaranga y’itegeko ku mato anyura muri Hormuz byaba binyuranyije n’uburenganzira mpuzamahanga bwo kugenda mu nzira z’amazi zikoreshwa n’ibihugu byinshi.
Yaburiye ko iyo gahunda ishobora guteza izamuka ry’ibiciro by’ingufu nka peteroli na gaze, kongera ifaranga rizamuka (inflation), no guteza ihungabana mu bucuruzi mpuzamahanga. Yanagaragaje ko ingaruka zayo zizagera ku baturage bo hirya no hino ku isi binyuze mu izamuka ry’ibiciro no guhungabana kw’ubuzima bwabo.
Iki kibazo kivutse mu gihe hari amakuru avuga ko Iran na Oman biri hafi kugirana amasezerano yo gufatanya gucunga Inyanja ya Hormuz, imwe mu nzira z’ingenzi zinyuramo ibikomoka kuri peteroli na gaze bijya ku masoko mpuzamahanga.
Umuyobozi wa IMO, Arsenio Dominguez, yari aherutse gutangaza ko nta gihugu gifite uburenganzira bwo gushyiraho imisoro cyangwa amafaranga ku mato anyura muri iyo nzira, ashimangira ko byaba ari ukwica amategeko mpuzamahanga
Impuguke mu bucuruzi mpuzamahanga, Deborah Elms, yavuze ko ibihugu byo muri Aziya ari byo byakumva cyane ingaruka z’ayo mafaranga kuko ari byo bitumiza igice kinini cya peteroli na gaze biva mu bihugu byo mu Kigobe cy’Abarabu. Yavuze ko ibi byazamura ibiciro bya lisansi, ifumbire n’ibikoresho bya pulasitiki.
Kuva intambara hagati ya Leta Zunze Ubumwe za Amerika, Israel na Iran yatangira mu mpera za Gashyantare 2026, umutekano muri Hormuz warushijeho kuzamba. Iran yashyizeho uburyo bwo kwishyuzamo amato anyura muri iyo nyanja, ndetse muri Gicurasi ishinga urwego rwiswe Persian Gulf Strait Authority rugenzura iyo gahunda.
Nk’uko Umuryango Mpuzamahanga ushinzwe Ubwikorezi bwo mu Nyanja (IMO) ubivuga, kuva intambara yatangira hamaze kuba ibikorwa 64 by’umutekano muke muri ako gace, abantu 17 bahasiga ubuzima, naho abasare barenga 6,000 bakaba bakiri baraheze muri cyangwa hafi y’iyo nyanja.
