Nk’uko byari bisanzwe, umukino wa Real Madrid na mukeba wayo, FC Barcelona, wahuruzaga imbaga kubera ishyaka ryawugaragaragamo ariko kuri iyi nshuro ukaba ugiye kuba ibihangange muri ruhago, Ronaldo Cristiano na Lionel Messi bitawurimo.
Aya makipe yombi ni ayo muri Espagne akaba arakina kuri iki Cyumweru tariki ya 28 Ukwakira 2018, yombi ahatanira igikombe cya La liga.
Nk’uko BBC Sports ibitangaza, ngo iyi ni inshuro ya mbere mu myaka 11 ishize, aya makipe agiye gukina aba bakinnyi b’ibyamamare bombi bakabura mu kibuga.
Messi afite imvune y’ukuboko itamwemerera gukandagiza ikirenge mu kibuga mbere y’ibyumweru bitatu, mu gihe Ronaldo wakiniraga Real Madrid amaze amezi atatu ayivuyemo akerekeza mu Butaliyani mu ikipe ya Juventus.
Mu mikino 30 ngo aba bakinnyi bombi bagaragayemo, yabonetsemo ibitego 101, Messi yatsinzemo ibitego 20 anatanga amapasi 11 yavuyemo ibitego, mu gihe ngo Ronaldo we yatsinze 18 n’ipasi imwe, umusaruro wabo bombi ukaba ungana na 49.5%.
