Nyuma y’uko Leta y’u Burundi itangarije ko yataye muri yombi abasirikare b’u Burundi bane, bashinjwa kugira uruhare mu rupfu rwa Perezida Ndadaye Melchior , bitangazwa ko ubu bafunzwe mu buryo butandukanye.
Abo basirikare ni Gen Celestin Ndayisaba uzwi ku izina rya Kibadashi, Col Gunungu Gabriel, Col.Nahigombeye Anicet hamwe na Col.Niyonkuru Laurent. Bose batawe muri yombi mu mpera z’icyumweru gishize, Perezida w’Urukiko rw’Ikirenga mu Burundi, Sylvestre Nyandwi akaba yaratangaje ko bafashwe mu rwego rwo guca umuco wo kudahana.
Uko ari bane, nta numwe ufunganwe n’undi nk’uko ikinyamakuru UBM kibitangaza, aho ngo Gen Celestin Ndayisaba afungiye muri gereza ya Muramvya, Col Gunungu Gabriel muri gereza ya Ngozi, Col.Nahigombeye Anicet afungiye muri gereza ya Muyinga, mu gihe Col.Niyonkuru ari mu ya Gitega.
Iki kinyamakuru gikomeza gitangaza ko aba bose bajyanwe gufungirwa muri izi gereza zitandukanye ku wa Gatandatu tariki ya 24 Ugushyingo 2018, nyuma y’umunsi wose bamaze babazwa ibibazo muri pariki nkuru y’u Burundi.
N’ubwo badafunzwe mu buryo bumwe ndetse no muri gereza zimwe, bose bahuriye ku cyaha bashinjwa cyo kugira uruhare mu itegurwa rw’umugambi wo kwica Ndadaye, Perezida wa Mbere w’u Burundi wari watowe n’abaturage.
Melchior Ndadaye yishwe tariki ya 21 Ukwakira 1993, amaze amezi atatu abaye Perezida, urupfu rwe rwakurikiwe n’intambara y’abaturage, aho bamwe barwaniraga kumuhorera.
