Guverineri wa Kivu y’Amajyaruguru, Julien Paluku, yimuye ibiro bye abikura i Goma abyimurira muri Rutshuru mu rwego rwo kwita ku kibazo cy’umutekano kivugwa aha hantu no gufatanya n’abaturage bya hafi gushakira hamwe ingamba zakwifashishwa mu gushakira igisubizo kirambye iki kibazo.
Ku munsi wa mbere akorera muri Rutshuru, kuri uyu wa Kabiri tariki 22 Werurwe, Guverineri Paluku yahurije hamwe komite y’umutekano mu ntara, abayobozi ku rwego rw’ibanze, abayobozi gakondo ndetse n’abagize sosiyete sivile.
Abitabiriye iyo nama batangaje icyakorwa kugirango ikibazo cy’umutekano gikemuke burundu muri Teritwari ya Rutshuru, urangwa no gushimuta ku mihanda mikuru ndetse n’ibikorwa by’imitwe yitwaje intwaro ndetse n’uko amoko ahatuye yabana mu mahoro.
Nk’uko byemejwe n’umuyobozi gakondo wa Chefferie ya Bwisha, Dieudonné Ndeze, ngo abashinzwe umutekano nibo bashobora kurangiza iki kibazo cy’umutekano mucye. Yavuze ko ari cyo igipolisi ndetse n’igisirikare bishinzwe akaba ari cyo babitezeho nk’uko Radio Okapi dukesha iyi nkuru ivuga.
Guverineri Paluku ngo arateganya gufatanya n’abaturage mu gikorwa cyo kugenzura umwirondoro wa buri muturage bikozwe n’abayobozi b’inzego z’ibanze bazagenwa n’ubuyobozi ndetse n’abaturage. Iki gikorwa ngo kikazafasha kugenzura urujya n’uruza rw’abaturage muri iyi zone.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
