Umwe mu rubyiruko rw’ishyaka riri ku butegetsi mu Burundi ruzwi nk’Imbonerakure mu ijoro rishyira kuri Noheri yishwe arashwe n’umupolisi w’igihugu ahitwa Matana mu Ntara ya Bururi mu majyepfo y’igihugu.
Uyu witwa Elias Ntakirutimana, wari umuyobozi w’Imbonerakure kuri aka gasozi ka Matana, ngo yishwe n’isasu yarashwe n’ukuriye station ya polisi y’aha hantu witwa Simon Ndayikengurukiye wahise utabwa muri yombi.
Nyuma yo gutabwa muri yombi nk’uko tubikesha SosMedias, uyu wari ukuriye iyi station ya polisi ya Nyagihotora yavuze ko yarashe Ntakirutimana yirwanaho.
Yavuze ko iyi Mbonerakure iri kumwe n’akandi gatsiko yaketse ko yasinze bagashaka kumwambura imbunda, akemera ko yarashe umwe muri bo agahita ahasiga ubuzima.
Uyu mupolisi biravugwa ko afungiye muri Gereza Nkuru ya Bururi kuva kuwa Gatatu aho ategereje ikizakurikiraho.
