Umurwanashyaka wa FDU Inkingi witwa RENZAHO Janvier utuye mu mudugudu wa Nyarugenge, akagari ka Kinunga, umurenge wa Remera wari watawe muri yombi ku mugoroba wo kuri uyu wa Gatatu yarekuwe nk’uko byemezwa na Perezida w’iri shyaka ritaremerwa gukorera mu Rwanda, Ingabire Victoire.
Abinyujije ku rukuta rwe rwa facebook, Ingabire Victoire yari yagize ati: “ Ahagana SAA 21:00 asohotse muri alimentation ahura n’umudemobu uzwi ku izina rya Gacaca aramuhagarika. Amubwira ko ari wanted(ashakishwa) hanyuma ahamagara ubuyobozi bw’umurenge “.
Yakomeje agira ati: “ Mu masaha yo kumanywa bakaba bari bigeze guhura aramubaza ati:” Iyo mujya kuri uriya mugore( Victoire Ingabire) muba mujya gushaka yo iki, ko ntacyo azabamarira, ntimushobora kudutsinda “.
Yavuze ko yatwawe n’umuyobozi wa polisi hamwe n’Umunyamabanga Nshingwabikorwa w’Umurenge wa Remera witwa Michel kuri station ya polisi ya Remera.
Ingabire Victoire wakomeje asaba leta kumugaragaza no kubabwira impamvu yatumye umurwanashyaka wabo atabwa muri yombi yongeye kugarukana amakuru mashya avuga ko uyu muyoboke wabo yarekuwe ariko ntihagira ibisobanuro birenzeho atanga nk’impamvu yari yafashwe.
Â
Â
