Leta Zunze Ubumwe za Amerika zemereye igihembo kingana na miliyoni y’Amadolari umuntu uzatanga amakuru kuri umwe mu bahungu ba Osama Bin Laden wahoze akuriye umutwe w’iterabwoba wa Al Qaida.
Abayobozi ba Leta Zunze Ubumwe za Amerika bavuga ko Hamza Bin Laden bikekwa ko aherereye hafi y’umupaka wa Afghanistan na Pakistan, agaragara nk’aho ari we ugiye kuyobora uyu mutwe.
Mu myaka ishize nibwo uyu muhungu wa Osama yatambukije ubutumwa buhamagarira abarwanyi ba Al Qaida kugaba ibitero kuri Amerika n’inshuti zayo z’Abanyaburayi mu rwego rwo guhora urupfu rwa se.
Amerika ikaba yarahise ishyira Hamza Bin Laden uri mu myaka 30 ku rutonde rw’intagondwa ku isi. Bivugwa kandi ko Hamza yarongoye umukobwa wa Mohammed Atta, umwe mu bashimuse imwe mu ndege zakoreshejwe mu bitero byo muri Nzeri 2001 kuri World Trade Center.
Amabaruwa yafashwe yasizwe na Osama Bin Laden akaba ngo agaragaza ko yari yatangiye gutegurira Hamza kuzamusimbura nk’umuhungu we yakundaga cyane nk’uko iyi nkuru dukesha BBC ivuga.
Mu 2011 nibwo umutwe udasanzwe w’ingabo za Leta Zunze Ubumwe za Amerika wishe Osama Bin Laden mu gitero cyagabwe ahantu yari yihishe mu mujyi wa Abbottabad mu gihugu cya Pakistan.
