Abantu 24 bafashwe n’inzego z’umutekano bari mu bikorwa byo kubaka inzu mu mudugudu wa Ganza mu kagali ka Kiyovu mu Murenge wa Nyarugenge mu Mujyi wa Kigali.
Umunyamabanga Nshingwabikorwa w’agateganyo w’Umurenge wa Nyarugenge, Fanny Ingabire yatangaje ko abafashwe bari mu gikorwa cyo gusana inzu mu masaha ya saa yine za mu gitondo zo kuwa 7 Mata 2019 umunsi hatangijwe ibikorwa byo kwibuka jenoside yakorewe Abatutsi mu 1994.
Yagize ati “ Nibyo koko abantu 24 bafashwe n’inzego z’umutekano bari gusana inzu mu gihe cy’amasaha y’umuhango wo kwibuka ku nshuro ya 25 jenoside yakorewe Abatutsi. Twabashyikirije polisi turaza gukora raporo tuyishyikirize inzego z’ibishinzwe.”
Aba batawe muri yombi bakoreraga ibi bikorwa mu murenge warimo kuberamo umuhango wo kwibuka ku nshuro 25 jenoside yakorewe Abatutsi ku rwego rw’akarere ka Nyarugenge, umuhango watangiye ku isaha ya saa mbiri n’igice witabiriwe na Meya Kayisime Nzaramba, Umuyobozi w’umujyi wa Kigali w’ungirije ushinzwe ubukungu n’abandi bayobozi batandukanye.
[penci_related_posts dis_pview=”no” dis_pdate=”no” title=”Izindi nkuru wasoma” background=”” border=”” thumbright=”no” number=”4″ style=”list” align=”none” withids=”” displayby=”recent_posts” orderby=”rand”]
Mu gihe hazakorwa iperereza bikagaragara ko ibikorwa barimo hari aho bihuriye no gupfobya Jenoside yakorewe Abatutsi, Ingingo ya 135 yo mu gitabo cy’amategeko ahana y’u Rwanda, ivuga ko umuntu wese ukoze icyaha cy’ingengabitekerezo ya Jenoside n’ibindi byaha bifitanye isano na yo ahanishwa igifungo kirenze imyaka itanu kugeza ku myaka icyenda n’ihazabu y’amafaranga y’u Rwanda kuva ku bihumbi ijana kugeza kuri miliyoni imwe.
Source: Hanga.rw
Â
