Umunyamakuru Hassan Ruvakuki wahoze akorera Radio Bonesha FM mu gihugu cy’u Burundi kuri uyu wa kabiri ushize yararusimbutse nyuma y’abantu bagerageje kumwivugana.
Biravugwa ko abantu bitwaje ibirwanisho bateye iwe mu rugo mu ijoro ryo kuri uyu wa Kabiri ushize mu gace ka Kajaga, Komini Mutimbuzi, mu Ntara ya Bujumbura, mu burengerazuba bw’igihugu.
Inshuti za Ruvakuki zivuga ko yaguye mu mutego w’abantu bitwaje imipanga mu gihe yari arimo gutaha iwe ahagana saa saba z’ijoro nk’uko bitangazwa n’Ijwi rya Amerika dukesha iyi nkuru.
Aba bavuga ko yari asohotse mu modoka ageze iwe ubwo agatsiko k’abantu bitwaje imipanga bamuteraga bakamukomeretsa mu mutwe, ku musaya no ku kaboko. Izi nshuti ze zinavuga ko ari umutego wari watezwe neza kandi abamuteye bamusize bazi ko yapfuye mbere yo gutwara telephone ye igendanwa.
Muri iryo joro, Hassan Ruvakuki yahise ajyanwa kwa muganga ku bitaro biri hafi aho ngo yitabweho. Amashusho yagiye asangizwa ku mbuga nkoranyambaga mu Burundi yerekana uyu mugabo afite integer nke, afite ibipfuko ku mutwe, ku kaboko no ku musaya.
Iyi nkuru irasoza ivuga ko Hassan Ruvakuki yigeze gutabwa muri yombi mu Ugushyingo 2011, akaza kurekurwa muri Werurwe mu 2013 nubwo iyi nkuru itavuga icyo yaziraga.
