RDC: Inyeshyamba 61 zirimo iza FDLR na RNC ya Kayumba Nyamwasa zishwe
Igisirikare cya Repubulika Iharanira Demokarasi ya Congo, kuri uyu wa Gatanu tariki ya 14 Kamena 2019, cyatangaje ko inyeshyamba 61 zishwe mu mezi abiri ashize mu bitero bitandukanye byagiye bigabwa muri Teritwari ya Masisi na Rutshuru, muri Kivu y’Amajyaruguru.
Umuvugizi wa Operasiyo yiswe Sokola 2, igamije guhashya imitwe y’inyeshyamba, Major Ndjike Kaiko avuga ko ibitero byagabwe ku nyeshyamba za CNRD-RNC, zigizwe n’inyeshyamba zikomoka mu Rwanda za FDLR, inyeshyamba za NDC (Nduma défense of Congo), inyeshyamba za Nyatura ndetse na RNC ya Kayumba Nyamwasa nk’uko raporo ya Loni ibivuga.
Akomeza avuga ko inyeshyamba zisaga 100 zafashwe mpiri, intwaro nyinshi zitatangajwe umubare nazo zirafatwa. Yagize ati “Twishe inyeshyamba 61 zo muri iyi mitwe yose yishyize hamwe, abasaga 100 twabafashe mpiri n’intwaro zisaga 100 zirimo imbunda zo mu bwoko bwa AK47, RPG7, PK, Gerenade, amasasu,…”.
Mu kiganiro yagiranye n’abanyamakuru i Goma, yabatangarije ko uduce dutandukanye izi nyeshyamba zari zarigaruriye, FARDC yazitwambuye. Utwo duce ngo ni utwo muri Pariki ya Virunga, muri Teritwari ya Rutshuru.
Avuga ko umuyobozi w’inyeshyamba za FDDH/Nyantura yishyize mu maboko ya FARDC ari kumwe n’abarwanyi be 60. Undi muyobozi w’inyeshyamba witwa Kavubi Sibomana na we wari uyoboye inyeshyamba, na we yishyikirije iki gisirikare cya Leta ari kumwe n’abarwanyi be 22.
Â
