Tariki ya 22 Kamena, umuyobozi wa leta ya Amhara, Ambachew Mekonnen n’umujyanama we muri Ethiopia biciwe mu gitero cyari kigamije guhirika ubutegetsi. Amakuru avuga ko n’umugaba mukuru w’iki gihugu yarasiwemo.
Ibitangazamakuru byo muri iki gihugu byavugaga ko hataramenyekana abagabye iki gitero muri iyi leta iherereye mu majyaruguru y’umurwa mukuru Addis Ababa ariko Brigadier General Tefera Mamo, umuyobozi w’ingabo zidasanzwe yatangaje kuri iki cyumweru ko benshi bagabye iki gitero bamaze gutabwa muri yombi n’ubwo uri hejuru yacyo ataramenyekana.
Minisiteri w’Intebe muri iki gihugu, Abiy Ahmed yavuze kuri uyu wa gatandatu ko umugaba umukuru w’ingabo, General Seare Mekonnen yarasiwe muri iki gitero ubwo yashakaga kugihagarika, amakuru dukesha BBC avuga ko uyu mugaba w’ingabo yasize ubuzima muri iki gitero arashwe n’abamurinda.
Amakuru yabanje kuvugwa yavugaga ko Ambachew Mekonnen n’umunyamabanga we ngo barashwe n’abo bakorana bya Hafi, Seare Mekonnen araswa n’ingabo zishyurwa (mercenaries).
Abiy akomeza avuga ko ubwo iki gitero cyagabwaga muri Amhara, bari mu nama n’abandi bayobozi. Avuga ko abishwe n’abakomerekeyemo atari benshi.
Kuva Abiy yagera ku butegetsi, yakoze impinduka zitandukanye nko kubohora imfungwa za politiki no gukuraho ibihano ku mashyaka ya politiki. Muri aba baunguwe harimo n’uwahoze ahagarariye abashinzwe umutekano muri Amhara, akaba ari na we ukekwaho guhirika ubu butegetsi.
Min. Abiy Ahmed yategetse ko hakorwa iperereza ku muntu uri hejuru y’iki gitero.
Â
