Abantu 12 barimo batatu barinda umukuru w’igihugu (SFC), abapolisi n’abandi bakozi mu gisirikare bafunzwe bashinjwa gutanga amakuru y’umutekano yashoboraga gutuma habaho ihirikwa ry’ubutegetsi.
Abashinjwa bagejejejwe imbere y’urukiko rwa Gisirikare ruri Makindye, ruyobowe na Lt. Gen. Andrew Gutti kuwa 7 Kanama uyu mwaka.
Mu bashinjwa harimo; IP Peter Ayebare wari usanzwe akora mu by’ikoranabuhanga ahitwa Naguru, DC Tadeo Judas wakoreraga Kireka mu ishami rikora iperereza ridasanzwe ahitwa Kireka, Martin Kimbowa ukora mu ishami rishinzwe kurinda abatangabuhamya, Sadafu Marture, ukorera Naguru na Felix Oyugi ukorera mu ishami rirwanya iterabwoba ku Kibuga cy’Indege cya Entebbe.
Mu basirikare harimo, CPL Abdallah Ajobe, urinda ku nzu y’umukuru w’igihugu iri Nakasero, Pte Paul Okweny, injeniyeri muri SFC na mugenzi we, Henry Abong.
Abandi baregwa harimo uwitwa Wilson Atekateka, utuye Lukuli muri Lubaga, Moses Kasiba, uwatangaga amakuru muri UPDF, Difas Frnak Nyindo, umukanishi utuye Nansana na Silver Olinga Elwelu, ukora akazi k’isuku.
Ubushinjacyaha buvuga ko abaregwa bagiye bakora inama mu bihe bitandukanye kuva muri Werurwe kugeza muri Nzeri 2018 . Aba ngo babaga bagamije kwandika abantu kugira ngo babinjize mu nyeshyamba.
Buvuga ko ibi byari bigamije guhirika ubutegetsi ndetse no gushyira ingabo z’igihugu mu kaga.
Umushinjacyaha, Maj. Samuel Musereje yasabye ko urubanza rwaba rusubitswe kuko hagikorwa iperereza.
Ikinyamakuru Eyalama dukesha iyi nkuru kivuga ko abaregwa bahakana ibyo baregwa ariko bakaba bamaze umwaka wose bafunzwe.
Urubanza rwasubitswe, ababurana bajya gufungirwa muri Gereza ya Luzira na Makindye.
Urubanza rwabo ruzakomeza ku itariki itatangajwe muri uku kwezi kwa Kanama.
