Abaganga batatu b’Abanyekongo barakekwaho kugira uruhare mu iyicwa ry’impuguke mu bijyanye n’ibyorezo ikomoka muri Cameroun yakoreraga Ishami ry’Umuryango w’Abibumbye ryita ku Buzima, OMS.
Ubutabera bwa Repubulika iharanira Demokarasi ya Congo kuri uyu wa Gatatu, itariki 07 Kanama, bukaba bwemeje ko bufite abaganga batatu mu baganga bane b’Abanyekongo bashinjwa kugira uruhare mu gitero cyagabwe ku itsinda ryari rishinzwe kurwanya Ebola cyatwaye ubuzima bw’umuganga wa OMS mu burasirazuba bwa Congo.
Lieutenant-colonel Jean-Baptiste Kumbu Ngoma, umushinjacyaha w’Urukiko rwa Gisirikare rwa Butembo yagize ati: “ Aba baganga bakurikiranweho iterabwoba, no kwifatanya n’abagizi ba nabi ”
Yongeyeho ko aba bashinjwa kuba barakoze inama kuwa 14 Mata 2019 yo gutegura kwica Dr Richard Mouzoko, wari impuguke ya OMS mu bijyanye n’ibyorezo.
Abaganga b’Abanyekongo batawe muri yombi ni ba docteurs Hippolyte Sangala Kisako, Aurélien Luendo Paluku na Gilbert Kasereka. Umushinjacyaha yongeyeho ko abandi bantu batatu barimo umugore na bo bafunze bakurikiranweho ubu bwicanyi.
Ubushinjacyaha buvuga ko umuganga wa kane ushinjwa ariko uri hanze y’igihugu ari Dr Mundama Witende. Nk’uko iyi nkuru dukesha Jeune Afrique ikomeza ivuga.
Me Jean-Guelord Kizito Poipo, wunganira Dr Sangala, yemeje ko umukiriya we yatawe muri yombi kuwa Kabiri ushize, ariko yamubwiye ko atigeze agera mu nama ivugwa yateguriwemo ubwicanyi.
Umushinjacyaha we ashimangira ko abo baganga batatu ari bo bari inyuma y’iyicwa rya mugenzi wabo wakoreraga OMS, Dr Richard Valery Mouzoko.
Dr Richard Valery Mouzoko yiciwe, kuwa 19 Mata 2019, mu gitero cy’abantu bitwaje intwaro ku Bitaro bya Kaminuza bya Butembo, aho yari ayoboye inama yagiranaga n’itsinda ryari rishinzwe kurwanya Ebola.
Igihugu cya Repubulika iharanira Demokarasi ya Congo kikaba kimaze umwaka gihanganye n’icyorezo cya Ebola kimaze guhitana abantu 1,820 cyane cyane muri Beni, Butembo, Katwa na Ituri.
