Abantu babarirwa mu bihumbi bahuriye i Moscow mu murwa mukuru w’u Burusiya mu myigaragambyo yo kwamagana ihezwa rya bamwe mu bakandida batavuga rumwe n’ubutegetsi mu matora y’abayobozi b’imijyi.
Iyi myigaragambyo yabereye i Moscow niyo yitabiriwe n’abantu benshi kuva Vladimir Putin yongeye gutorwa mu mwaka wa 2012. Mu yindi mijyi naho habaye imyigaragambyo.
Umuryango utegamiye kuri leta ukurikiranira hafi iby’iyo myigaragambyo, The White Counter, uravuga ko abantu bagera ku 50,000 bari bayitabiriye mu Mujyi wa Moscow. Abo baruta umubare w’abapolisi bari muri uwo mugi kuko babarirwa mu 20,000 gusa.
OVD-Info, irindi tsinda rikurikirana amakuru y’imyigaragambyo ryavuze ko hari abatawe muri yombi mu Mujyi wa Moscow n’ahandi nko mu Mijyi ya St. Petersburg na Roston-on-Don nk’uko iyi nkuru dukesha VOA ivuga .
Umwe mu bakandida batavuga rumwe n’ubutegetsi Lyubov Sobol, n’umwe mu batawe muri yombi mu biro bye i Moscow. Yarimo yandika ku rubuga nkoranyambaga atanga amakuru ku bamushyigikiye mbere gato y’uko imyigaragambyo itangira.
Amashusho yagaragaye ku rubuga rwe rwa Twitter yerekanye abapolisi binjira ku gahato mu biro bye babwira abanyamakuru bari bahari guhagarara baringaniye n’urukuta bakabika telephone zabo.
