Agathon Rwasa uza imbere mu batavuga rumwe n’ubutegetsi mu Burundi, abadepite 2 bo mu ishyaka rye, CNL n’abakomoka mu mashyaka ari mu ihuriro “Burundi bwa bose” ntibari mu rutonde rw’abemerewe kuziyamamaza mu matora y’abadepite ateganyijwe muri Kamena 2025.
Komisiyo yigenga ishinzwe amatora mu Burundi, CENI, yasohoye urutonde rw’abemerewe kuzitabira amatora yo mu kwa gatandatu ku mugoroba wo ku wa Kabiri ushize.
Ihuriro Burundi bwa Bose ryakumiriwe muri ayo matora, ryemewe na minisiteri y’ubutegetsi bw’igihugu kuwa 17 Ukuboza 2024. Rihuriyemo amashyaka ya FRODEBU, CODEBU, FDES na CNDD.
CENI yavanye ihuriro Burundi bwa Bose ku rutonde rw’abemerewe guhatana nyuma y’iminsi itageze ku cyumweru, Agathon Rwasa atangaje ko azifatanya n’iri huriro mu matora.
CENI yasobanuye ko yavanye ihuriro Burundi bwa Bose ku rutonde rw’abemerewe kuziyamamaza, kubera ko urutonde rw’iri huriro rwari ruriho abadepite 3 bo mu ishyaka CNL Kandi ritari muri iryo huriro.
Kuri CENI, ibi binyuranyije n’ingingo y’112 y’itegeko rigenga amatora n’iy’7 y’itegeko rigenga amashyaka.
