Mu itangazo ryashyizweho umukono i Bukavu ku wa 20 Ugushyingo 2019 na Me Bukuru Ntwari, umunyamategeko, umushakashatsi akaba n’umusesenguzi mu byerekeye kurengera ikiremwa muntu, yifuje ko abo yise ko bakora jenoside y’abanyamulenge bagezwa imbere y’ubutabera.
Muri iryo tangazo yerekanamo imitwe itandukanye n’amazina y’abantu bamwe bakwiriye kwamwaganwa ku isi yose, bagasabwa guhagarika guhonyanga ubwoko bw’abanyamulenge.
Muri iyo mitwe atunga agatoki Mai Mai, RED-Tabara, FNL, na FOREBU ku ruhande rumwe n’abantu ku giti cyabo iryo tangazo rivuga ko bahembera, bakanenyegeza ingengabitekerezo mu mbwirwaruhame zigamije kurimbura ubwoko bw’abanyamulenge ku rundi ruhande.
Iryo tangazo rikaba rihamagarira abanyamulenge ku isi yose, guhaguruka no kwamagana iyo mitwe yavuzwe haruguru ndetse n’abari ku rutonde kugira ngo bahagarike ibikorwa by’ubwicanyi no gusaba ko ababifitemo uruhare bakurikiranwa n’ubutabera.
Uryo tangazo ariko ntabwo rivuga ubutabera bwakurikirana iyo mitwe yitwara gisirikari n’abari ku rutonde rw’abigisha icengezamatwara akangurira abantu kwica abanyamulenge.
Abashyirwa mu majwi ni aba bakurikira:
1. Alexis Sinduhije wa Red Tabara,
2. Augustin Ngenzi, umuvugizi w’abarwanyi ba RED-Tabara,
3. Gen. Godefroid Niyombare, uyobora FOREBU, wagerageje gukorera Military Coup, Pres. Nkurunziza, igapfuba,
4. Aloys Nzabampema wa FNL/ PALIPEHUTU unaregwa ubwicanyi bw’abanyamulenge mu Gatumba mu 2004,
5. Mgr Timothée Bodeka wa Kikwit, RDC
6. Emmanuel Rukeba uba mu USA,
7. Nyamuhombeza Ombe, umushi w’Umukongomani uvuga agategwa ikinyamulenge akaba atuye aba Finland,
8. Kaliba Mulanga Pardone
9. Gen. Mundos, wo muri FARDC,
10. Honoré Ng’ banda Nzambo ko Atumba,
Muri iryo tangazo andi moko muri rusange yanze kwiyunga n’andi y’abicanyi guhera za 1964 kugeza 2019 ariyo Abashi, Abarega, Ababwari, Abarindi, Abatwa, Abavira n’Ababangubangu.
Nubwo bimeze bityo, abantu benshi bakomeje kwibaza igituma guverinoma ya Congo na MONUSCO bidahagurukira guhagarika ubwicanyi bubera i Mulenge, umuntu akaba yakeka ko haba harimo ukugambanirwa k’ubwoko bw’abanyamulenge. Umuntu ashobora kwibaza kandi igituma ibihugu byo mu karere Congo/Kinshasa irimo byacecetse kimwe n’imiryango y’ akarere nka SADC, CEAC, na AU.
Mu gihe twandika iyi nkuru hari amakuru acicikana avuga ko Mai Mai ziherutse gutera ingabo za MONUSCO ndetse n’ingabo za FARDC mu Minembwe no mu nkengero zaho, abatewe bikavugwa ko bapfushije abasirikare batavugwa umubare. Aya makuru ariko akaba ataremezwa n’abadafite aho babogamiye.
Biramutse ari byo; ese koko Mai Mai zaba zikura he izo mbaraga? Zikura he ibirwanisho n’abarwanyi bakomeye? Ibi byose nibyo kwibazaho.
Tugarutse ku batunzwe agatoki ku bakora icengezamatwara ry’urwango ku banyamulenge, birakwiye ko ibitangazamakuru mpuzamahanga byabima uruvugiro kuko bituma batanga ubutumwa bumarisha abaturage.
Abanyamulenge na bo bakwiriye kwirinda gukora nk’ibyo bakorerwa byo gutukana bya gihezanguni bihimura ku moko n’imitwe ibagabaho ibitero ahubwo bakazamura amajwi agaragaza ukuri kwabo, kwamagana no gusaba ko ubwicanyi bakorerwa bwahagarara.
#SaveMULENGE#
