Umusenateri wo mu Burundi witwa Gedeon Gahungu aravugwaho gukubita agafuni umugore we n’umugabo yabasanganye iwe mu rugo akabakeho kuba bamuca inyuma, arangije arahunga azi ko asize abishe agenda agonga abantu mu muhanda abagera ku 10 barakomereka barimo babiri barembye. Ibi byabereye mu gace ka Kamenge, mu Mujyi wa Bujumbura, kuri uyu wa 7 Ukuboza 2019.
Amakuru ya mbere yavugaga ko uyu musenateri yishe umugore n’abana ku bw’impamvu itari yakamenyekanye.
Amakuru mashya atandukanye n’aya mbere avuga ko ahubwo Senateri Gedeon yasanze umugore we ari kumwe n’umushyitsi w’umugabo mu rugo, akikoza mu mbere akaza agafuni agatangira kubahondagura mu mutwe.
Umuvugizi w’Igipolisi, Pierre Nkurikiye, mu kiganiro yagiranye n’Ijwi rya Amerika yasobanuye uko byagenze.
Ati: “Nka saa tatu n’iminota 40 za mu gitondo, umusenateri witwa Gedeon Gahungu, yakubise umugore we n’umushyitsi wari wabagendereye, agafuni mu mutwe, hanyuma kubera ko afite abana bakuze bahita bakoma induru bajya gutabara abo bari barimo gukubitwa agafuni.”
Yongeyeho ko nyuma yo kubona batangiye guhurura batabara kubera induru y’abana yahise afata imodoka agahita ahunga akagendera ku muvuduko mwinshi yagera ku Kinama agatangira kugenda agonga abantu.
Ati: “Kuva kuri Ave Maria kugeza ku muhanda wa munani (Ibarabara rya munani) wo mu Kamenge…yagiye agonga abantu n’ibintu, aho yagonze imodoka zigera kuri esheshatu, amagare agera kuri atanu Bajaj eshatu n’izindi moto zigera kuri enye.”
Yongeyeho ko muri uko kugonga ari bwo abantu 10 bakomeretse barimo babiri barembye cyane, ariko abashinzwe umutekano bakaba babashije kumufata akaba agomba gushyikirizwa ubutabera.
Yasoje avuga ko umugore we ndetse n’umushyitsi bakubiswe agafuni bajyanywe kwa muganga kandi ubuzima bwabo butari mu kaga.
