Mu gihe cy’ibyumweru bitatu, abarwanyi b’inyeshyamba za Maï-maï n’ab’umutwe wa CNRD urwanya Leta y’u Rwanda ubu bari mu maboko y’ingabo za Repubulika Iharanira Demokarasi ya Congo (FARDC).
Kuva ku wa 26 Ugushyingo- 14 Ukuboza 2019, ni abarwanyi 1900 ba CNRD (Conseil national pour le renouveau et la démocratie), umutwe w’inyeshyamba zitandukanije na FDLR-Foca hamwe n’abandi basaga 100 ba Maï-maï bafashwe.
Aba barwanyi bagiye bafatwa nyuma y’imirwano FARDC yagabye kuri izi nyeshyamba mu gace ka Kalehe, Intara ya Kivu y’Amajyepfo.
Nk’uko ikinyamakuru Actualitec kibitangaza, umuyobozi wa Batayo ya 33 ya FARDC, Gen Majoro Akili Muhindo Charle yavuze ko nyuma yo gufata izi nyeshyamba n’ibiteo bikomeje kuri zo.
Yagize ati “Mu misozi miremire ya Kalehe, Ubuyobozi bukuru bw’ingabo za CNRD n’ibindi birindiro byazo byarasenywe. abarwanyi 1951 n’ababakomokaho hamwe na 120 bo mu nyeshyamba zihakomoka hamwe n’intwaro n’amasasu byarafashwe mu gitero cyahagabwe. Bashyizwe i Nyamunyunyi, Bitale na Numbi. Ni imibare y’agateganyo kuko ibitero birakomeje,…”.
Gen Majoro Akili Muhindo akomeza avuga ko nyuma yo gufata izi nyeshyamba n’abazikomokaho, hubahirijwe amategeko agenga ikiremwamuntu, ari muri urwo rwego babashyize ahantu Guverinoma izi kugira ngo bafashwe.
Mu ijambo yagejeje ku bagize Inteko Nshingamategeko, imitwe yombi ku wa Gatanu tariki ya 13 Ukuboza 2019, Perezida Tshisekedi yavuze ko 95% by’ibirindiro izi nyeshyamba za CNRD zari zifite muri Teritwari ya Kalehe byazambuwe bityo agashima n’uruhare abaturage bagize mu ifatwa ry’abasaga ryabo.
Perezida Tshisekedi yashimye imbaraga abasirikare be bakoresheje mu guhashya izi nyeshyamba zikomeza guhungabanya umutekamo mu gihugu no mu Karere muri rusange.
Général Akili Muhindo Charles avuga ko abaturage bafatanije n’ingabo muri uru rugamba rwo guhashya izi nyeshyamba by’umwihariko ngo hakaba n’indi mitwe y’inyeshyamba z’abanye Congo yishyize hamwe kugira ngo ihashye inyeshyamba z’abanyamahanga.
Uku gufatwa mpiri kw’aba barwanyi kuje gukurikira iyicwa rya bamwe mu bayobozi bari bakomeye b’inyeshyamba za FDLR barimo Gen Mudacumura Sylvestre, Gen. Musabyimana wayoboraga RUD-Urunana n’abandi batandukanye abandi bafaratwa.
Inkuru bifitanye isano: https://bwiza.com/?Perezida-Tshisekedi-yemeje-ifatwa-mpiri-ry-abarwanyi-1712-ba-CNRD
