Ikibazo cy’ibura ry’amarimbi mu Ntara y’Amajyepfo cyatumye abahatuye basaba ko bafashwa kubona amarimbi hafi y’aho batuye, ndetse n’aho yashyizwe hagashakwa uburyo bwo korohereza abatishoboye ku kiguzi cyo gushyingura nk’aho mu irimbi ry’Akarere ka Huye riherereye mu Murenge wa Ngoma, bavuga ko badafite ubushobozi bwo kubona ibihumbi 600 Frw yo gushyingura ababo.
Uretse abaturiye amarimbi bataka ikiguzi kirenze ubushobozi bwabo bikabasaba kujya gushyingura ahandi basize aho begeranye, hari n’abandi bavuga ko n’ubusanzwe amarimbi abari ari kure.
Mu Turere twa Huye na Nyamagabe ubuyobozi buvuga ko bwatangiye kuvugurura ibishushanyo mbonera by’Uturere, hashakwa ahagomba gushyirwa amarimbi aho atari.
Naho ku kijyanye n’abadafite ubushobozi nk’uko iyi nkuru dukesha RBA ivuga, ngo hagiye gushakwa uburyo bwo kujya boroherezwa, nk’uko byemejwe na Meya wa Huye, Sebutege Ange na Visi Meya ushinzwe imibereho myiza y’abaturage muri Nyamagabe, Habimana Thadee .
Itegeko no 11/2013 ryo Kuwa 11/03/2013 rigena imitunganyirize n’imikoreshereze y’amarimbi ku ingingo ya 10, igaragaza ko Inama Njyanama y’Akarere ariyo igena imitunganyirize n’imikoreshereze y’amarimbi aho agomba gushyirwa.
Ingingo ya 25 y’iryo tegeko, ivuga ko ku bijyanye n’Icungwa ry’amarimbi bibujijwe kuharagira amatungo, kuhakorera ibiteye isoni, kuhamena ibishingwe, imyanda n’ibindi byose bibangamira icyubahiro gikwiye abashyinguwemo.
Kuri ubu ku rwego rw’Uturere hashyizweho komite zishinzwe imicungire y’amarimbi mu rwego rwo kumenya ibibazo bigenda biyagaragaramo.
Mu Rwanda habarurwa amarimbi 1439, mu gihe mu Ntara y’Amajyepfo habarurwa amarimbi 73 bivuze ko muri iyi Ntara hari imirenge itagira irimbi ryo gushyinguramo.
