Kuri uyu wa Gatatu, itariki ya 12 Gashyantare, Jean-Paul Boketsu Bofili, umusenateri wo mu Ntara ya Equateur, mu burengerazuba bwa Repubulika ya Demokarasi ya Congo, yaburiye ko indwara itazwi yateje impfu zirenga 50 mu byumweru bike mu karere ka Bansakusu.
Mu itangazo rigenewe abanyamakuru ryakiriwe na Radio Okapi kuri uyu wa Gatatu ushize, uyu muyobozi watowe yavuze ko abandi bantu benshi bahunze aho batuye kugira ngo birinde iyi ndwara.
Muri iri tangazo, asobanura kandi ko agace ka Bomate gaherereye mu birometero 25 uvuye mu Mujyi wa Basankusu, ari ho iyi ndwara irangwa no kuva amaraso menshi, kubabara umutwe, kubabara mu ngingo no kubabara umugongo, yahereye.
Senateri Boketsu avuga ko abafashwe n’iyi ndwara bapfa mu masaha 24.
Agira ati: “Kugeza ubu, mu cyumweru kimwe habaruwe abantu barenga 36 bapfuye bamenyeshejwe n’akarere k’ubuzima ka Basankusu, ni ukuvuga igihe cyo kuva ku itariki ya 3 kugeza ku ya 9 Gashyantare, ndetse n’abantu barenga 50 kuva iyi ndwara yagaragara mu byumweru bike bishize, muri kariya gace gafite abaturage bagera ku 5.000 gusa.”
Uyu muyobozi watowe akomeza yongeraho ko abantu barenga 2000 bamaze kuva mu mudugudu wabo kugira ngo bahungire mu Mujyi wa Basankusu no mu midugudu ihakikije.
