Ingabo za SADC zari zaroherejwe kurwana n’umutwe wa M23 muri Repubulika Iharanira Demokarasi ya Congo, kuri uyu wa Kabiri zacyuye ibikoresho byazo zibinyujije mu Rwanda.
Ni ibikoresho birimo intwaro, ibifaru by’amapine, imodoka zihetse ibifaru by’iminyururu, amato na za kontineri.
Kuri uyu wa Kabiri ibi bikoresho byari mu Karere ka Rubavu nyuma yo kwambutswa umupaka uhuza Goma na Gisenyi; mbere y’uko byerekezwa muri Tanzania.
Polisi y’u Rwanda ndetse n’Ingabo zarwo ni bo babiherekeje.
Biteganyijwe ko nyuma yo gucyura ibikoresho, hanataha abasirikare.
Mu mpera za 2023 ni bwo SADC yari yohereje mu burasirazuba bwa Repubulika Iharanira Demokarasi ya Congo ingabo zo mu bihugu bya Afurika y’Epfo, Malawi na Tanzania; mu rwego rwo gufasha ku rugamba FARDC yari ihanganye mu ntambara na M23.
Izi ngabo zatashye nyuma yo gutsindirwa mu mirwano yasize M23 ifashe umujyi wa Goma mu ntangiriro z’uyu mwaka.
SADC yafashe icyemezo cyo gucyura ingabo zayo, nyuma y’uko abakuru b’ibihugu bigize uyu muryango bafashe icyemezo cyo gusesa ubutumwa ziriya ngabo zari zaroherejwemo.
SADC na M23 bari baremeranyije ko ziriya ngabo zizataha zinyuze mu kirere; gusa uyu mutwe muri uku kwezi wasabye ko zitaha byihuse nyuma yo kuzishinja kugira uruhare mu bitero byagabwe mu mujyi wa Goma ku wa 11 Mata.
