Waziri wa Mambo ya Nje wa Rwanda, Olivier Nduhungirehe, amekanusha vikali taarifa zilizoenezwa na TV5 Monde ya Ufaransa, zilizodai kuwa yeye pamoja na mwenzake wa Jamhuri ya Kidemokrasia ya Kongo, Therese Kayikwamba, walikuwa Washington tarehe 2 Mei kwa mazungumzo kuhusu rasimu ya makubaliano ya amani — wakati ambapo hakuna hata mmoja wao aliyekuwa Marekani.
Kupitia ujumbe aliouandika kwenye X (zamani Twitter), Balozi na Waziri Nduhungirehe alisema ameshangazwa na taarifa hizo:
“Nilishangazwa kusikia kuwa mimi na mwenzangu kutoka Congo tulikuwa Washington tarehe 2 Mei kwa mazungumzo kuhusu rasimu ya makubaliano ya amani, ilhali hakuna hata mmoja wetu aliyekuwa huko.”
Aliendelea kufafanua:
“Jumamosi hii, tarehe 3 Mei, kwa hakika tulikuwa wote wawili (au watatu kwa pamoja na mshauri maalum wa Marekani Massad Boulos) huko Libreville, Gabon, kushiriki hafla yenye shamrashamra ya kuapishwa kwa Rais Brice Clotaire Oligui Nguema, aliyehitimisha miezi 19 ya kipindi cha mpito kwa mafanikio makubwa.”
Nduhungirehe alihitimisha ujumbe wake akibainisha kwamba hadi sasa, hakuna rasimu ya makubaliano ya amani inayoendelea kujadiliwa, kwa sababu rahisi kwamba michango ya pande zote husika bado haijawekwa pamoja.
