Jeshi la Pakistan limetangaza kuwa limefanya jaribio la kombora la masafa marefu, likisema kuwa jaribio hilo lililenga kuangalia uwezo wa majeshi yake kujibu tishio lolote na kuhakikisha viwango muhimu vya kiufundi vinatimia.
Jaribio hili lilifanyika Jumamosi iliyopita, wakati mvutano kati ya Pakistan na India ukizidi kuongezeka kufuatia shambulio la kikatili dhidi ya watalii katika eneo la Kashmir, linalozozaniwa na mataifa haya mawili yenye silaha za nyuklia.
Kwa mujibu wa taarifa ya Jeshi la Pakistan, kombora hilo lina uwezo wa kulenga umbali wa hadi kilomita 450.
Jaribio la kombora la Abdali lililenga kuthibitisha “uwezo wa majeshi kuwa tayari wakati wowote na kuhakikisha viwango vya kiufundi vya kisasa vinakidhi mahitaji”, ikiwa ni pamoja na mfumo wa kisasa wa kulielekeza kombora hilo, jeshi liliendelea kufafanua.
Rais Asif Ali Zardari na Waziri Mkuu Shehbaz Sharif waliwapongeza wanasayansi, watafiti na wote waliohusika kwa kufanikisha jaribio hilo kwa mafanikio.
Katika siku za hivi karibuni, Waziri wa Habari Attaullah Tarar alisema kuwa Pakistan inamiliki “taarifa za kuaminika” kuwa India inapanga shambulio dhidi ya Pakistan. Katika kauli yake, Tarar aliahidi kwamba kutakuwa na “jibu kali na la haraka” iwapo Pakistan itashambuliwa na jirani huyo anayemiliki silaha za nyuklia.
Ijumaa iliyopita, Pakistan iliomba mataifa rafiki kutoka Ghuba kuingilia kati kidiplomasia ili kusaidia kutuliza hali ya taharuki na India, baada ya shambulio lililotokea Aprili 22 upande wa Kashmir unaodhibitiwa na India, ambapo watu 26 waliuawa, wengi wao wakiwa Wahindu.
India imeilaumu Pakistan kwa kupanga shambulio hilo, lakini serikali ya Islamabad imekanusha vikali madai hayo.
