Nta bisobanuro biratangwa n’abayobozi kuri iki cyiciro, ariko Ikinyamakuru Gabon Review kiravuga ko ku wa Gatanu, umugore w’uwahoze ari Perezida wa Gabon, Ali Bongo, hamwe n’umuhungu we “bimuriwe mu rugo rwabo i La Sablière ngo abe ari ho bafungirwa bavanwe muri gereza”, kivuga ko kibikesha amasoko yizewe, kandi abizi neza.”
Nyuma y’umwaka urenga n’igice bafunzwe mu buryo ngo butarasobanuka neza, aya makuru agomba kuba yazaniye umuryango “kwiruhutsa”, nk’uko Ikinyamakuru, Le Pays, cyo muri Burkina Faso, kivuga.
Gabon Review yo ikomeza yemeza ko aya makuru “agaragaza impinduka zikomeye mu mategeko.
Ikinyamakuru Wakat Séra kivuga ko iyi ari “inkota ya Damocles”, mu gihe Aujourd’hui au Faso gihanura indi minsi itoroshye ku muhungu n’umugore wa Ali Bongo, “batararangizanya n’ubutabera.”
Icyifuzo cye Ali Bongo cyo kurekura umugore we n’umuhungu cyari giherutse kuba impfabusa imbere y’Umuyobozi mushya wa Gabon, Brice Clotaire Oligui Nguema, wamuhiritse mu 2023 ku butegetsi yari yaragiyeho mu 2009 asimbura se, Omar Bongo, wayoboye igihugu kuva mu 1967 kugeza apfuye mu 2009.
Ku itariki ya 9 Gashyantare, Ali Bongo Ondimba yijihije isabukuru y’imyaka 66 y’amavuko wenyine muri villa ye nini i La Sablière mu Murwa Mukuru Libreville. Yari kumwe gusa na nyina, Joséphine Kama, uzwi ku izina rya Patience Dabany.
