Rais wa Bunge la Taifa la Jamhuri ya Kidemokrasia ya Kongo (DRC), Vital Kamerhe, amemaliza ziara ya kikazi mjini Kampala ambako alikutana na Rais wa Uganda, Yoweri Kaguta Museveni.
Ziara hiyo ilifanyika kati ya Mei 9 hadi 12, ikifuatia ushiriki wa Kamerhe katika mkutano wa viongozi wa mabunge barani Afrika.
Kwa mujibu wa Radio France Internationale (RFI), Kamerhe aliandamana na wabunge wanne na ziara hiyo ilikuwa na malengo ya kidiplomasia pamoja na ya kibunge.
Ripoti zinasema kwamba Kamerhe alimkabidhi Museveni “ujumbe maalum” kutoka kwa Rais Félix Tshisekedi, ujumbe uliolenga kutathmini hali ya usalama katika eneo la mashariki mwa DRC.
Vyanzo mbalimbali vinasema kuwa ziara hiyo ni sehemu ya mfululizo wa mazungumzo kati ya Kinshasa na Kampala tangu Novemba 2024, kwa ajili ya kuimarisha ushirikiano wa pande mbili.
Mkutano huu na Museveni umefanyika wakati ambapo DRC na Rwanda wapo kwenye mazungumzo ya kusaini mikataba ya amani na ushirikiano wa rasilimali madini.
Wakati huo huo, Kinshasa haitaki kuiacha Uganda nje ya mazungumzo haya, ikizingatiwa kuwa ni nchi muhimu katika ukanda huu na yenye ushawishi mkubwa kijeshi.
Museveni, alipokutana na Kamerhe, hakutoa wasiwasi maalum lakini alisisitiza tamaa yake ya kuona amani ikirejea katika eneo hili, akionyesha kuwa kutokuwepo kwa usalama mashariki mwa DRC kunaathiri maslahi ya Uganda.
Kampala na Kinshasa wameahidi kuendeleza ushirikiano wao wa kijeshi kupitia Operesheni Shujaa, ambapo jeshi la Uganda (UPDF) linafanya kazi kwa pamoja na FARDC ya DRC kupambana na kundi la kigaidi la ADF.
